PULAU BRUIT: Pulau Bruit enggau bala tuai raban bansa meseti pintar ngatur tetiap isu tauka penanggul ke nyadi di genturung pendiau diri empu ngambi tetangkupka peminta enggau peneka peranak dia.
Sapit Menteri Di Opis Premier Sarawak (Pekara Korporat, Pemadah enggau Unit Komunikasi Awam Sarawak), Datuk Abdullah Saidol madah, nya endang tanggungpengawa besai genap tuai raban bansa ungkup pengelantang komuniti dia.
Ku iya, sida patut sedia mendingka sebana tauka peminta peranak lalu berumban madah ngagai pengari rayat tauka terus madah ngagai ejensi perintah bekaul dikena mutarka penanggul nya enggau meruan.
"Nengah penemu ti silik enggau proaktif, aku ngarapka penyerakup ditu ulih ditegutka agi enggau disungkak raban komuniti ditu,” ku iya lebuh bejaku Bejadika Pengerami Nerima Pengabang Hari Raya Aidilfitri Palan Servis Adun Semop 2024 di Balai Komuniti Kampung Tekajong, Pulau Bruit kena Hari Enam.
Pengerami nya mega dirichah enggau pengawa pemerindang sereta pengawa nyabut tikit benasip ti nyendia bemacaham perais.
Ba pengerami ke sama, Datuk Abdullah ke mega Kaban Kunsil Nengeri Semop bisi ngerandau peranak ke datai kelimpah serumpu makai bemacham bansa pemakai ke dinah.
Sama bela datai, Pemancha Bujang Razeli, Pemancha Pelilih Daro, Penghulu Kampung Tekajong Suib Basnu, Penghulu Kampung Bruit Wahab Gelugo, Penghulu Kampung Betanak Azmi sereta bala Tuai Bansa ba sitak nya.
Taun tu, Pengerami Nerima Pengabang Hari Raya Aidilfitri Palan Servis Adun Semop diatur ba enam zon ngaul zon utara enggau selatan Pulau Bruit, zon Paloh, zon Serdeng, zon Tanjung Bundung nyengkaum mega zon Kampung Melayu Bintangor ke alai genap genturung pendiau bisi peluang nyadi tuai pengatur nitih ke gintir.-EDISI UKAS
