Raban Pati Parti Nyadi Pengering PBB
Disiarkan pada 24 Oct 2024
Sumber Berita: UKAS
BETONG: Raban pati parti nyadi pengering ngagai Parti Pesaka Bumiputera Bersatu (PBB) semampai meruan tegap.
Sapit Yang di-Pertua PBB Datuk Amar Douglas Uggah Embas madah, pemujur ba tiap pengawa bepilih datai ari asil sereta pengeransing bala raban ti teguh begulai enggau Parti PBB.
“Kitai patut nyungkak pengawa parti tu. Tuju kitai ukai semina deka menang aja maya pengawa bepilih tang politik tu nyadi siti pelasar ke ulih mai penguntung sereta mai ubah ke manah agi ngagai rayat,” ku iya madah.
Iya madah munyi nya maya Aum Besai Pati Tiga Taun Sekali 2024-2027 Parti PBB Pampang N.37 Bukit Saban ditu, kena Hari Minggu tu tadi.
Nambahka jaku iya, Sapit Premier Sarawak nya madah, dikena ngenegap program ekonomi nengah Agensi Pemansang Sitak Betong (BDDA), kandang menua Bukit Saban bisi diungkupka belanja sepenyampau RM60 juta.
Agih belanja nya bela deka dikena nyaup rayat dia ngereja pengawa betanam betupi.
“Kitai udah bisi rintai peminta, lalu pemutus tu deka ditetapka abis laun bulan Disember taun tu,” ku iya madah.
Aum Besai Pati Tiga Taun Sekali 2024-2027 Parti PBB Pampang N.37 Saban nya bela deka dilanjar ba 10 pati agi.
Sebedau tu, kena 5 enggau 6 Oktober 2024, aum nya udah tembu diatur ba empat pati iya nya ba Kampung Ulu Spaoh, Kampung Penggan Spaoh, Kampung Tengah Spaoh enggau Kampung Ili Spaoh.
Naka ke diatu, bisi 14 ari 17 pati ke bisi ba Parti PBB Pampang N.37 Saban udah tembu ngatur Aum Besai Pati Tiga Taun Sekali 2024-2027.
Bisi tiga pati agi dilanggur deka ngatur aum nya kena 27 Oktober 2024 tu. -EDISI UKAS
