NGEMAH: Tim Patball ari Bintulu udah menggi gelar champion ba Pekit Sepak Takraw Trofi YB Anyi Jana 2024 kena Hari Minggu tu tadi.
Ari pemujur tim nya mai sida nerima perais mata duit RM1,000, trofi enggau trofi pusingan.
Berebak enggau nya, tim Sibu Jaya ari Sibu bu penuduk lumur dua lalu bulih perais mata duit RM700 enggau trofi.
Kelimpah ari nya, tim Sakang Seribu 24 A ari Pasai Siong bulih penuduk lumur tiga ti mai perais mata duit RM 500 enggau trofi.
Pengerami nyuaka perais dipenyadi Kaban Kunsil Nengeri (ADUN) Ngemah, Anyi Jana di Gelanggang Rh. Barnabas, Sungai Tuah, Kanowit.
Iya mega madahka pengandal ati ngagai Gerempung Nembiak PRS Sitak Ngemah enggau Kelab Nembiak Pasar Kanowit laban udah mujur ngatur pekit nya.
Iya mega arap mayuh agi pemain ari raban nembiak taun baru ulih ngambi bagi va pekit nya ila.
Ku iya, pekit nya mega ukai semina ngiga tim bulih gelar champion aja tang ulih mai pemaik ngagai pengerai, pengeregas enggau ulih ngisi maya lepa raban nembiak.
Bisi 18 iti tim ari Kanowit, Sibu, Selangau enggau Bintulu udah ngambi bagi ba pekit dua hari nya.
Sama datai, Chairman Ngatur Pekit ke mega Tuai Nembiak PBB Sitak Ngemah Stenny Willis, Penghulu Lembat Atau, Penghulu Dunstan Mandau, Kaunsilor Juin Adan, Sapit Chairman PRS Sitak Ngemah Ramba Resang enggau bala temuai ke bukai. - EDISI UKAS
