MUKAH: Komuniti Melanau patut besaup ngemansangka bansa diri kelebih agi ba pengidup sosial sida awak ulih mujur ba semua pengawa.
Kaban Kunsil Nengeri (ADUN) Balingian, Abdul Yakub Arbi madah, bansa Melanau mega patut besaup enggau pangan diri dikena nyungkak ekonomi, pekara pelajar enggau pengidup sosial sida.
Tu nyengkaum ba pengerami baka Kaul Mukah tauka ba pengawa ke bukai, ku iya.
Iya nerangka pekara nya maya Aum Besai Gerempung Melanau Mukah 2024-2026 di Kingwood Mukah, kena Hari Enam tu tadi.
“Aku ngarapka genap iku kaban gerempung bisi juluk enggau buah runding dikena sida mantaika lanting, budaya nyengkaum bansa Melanau empu ngagai rayat,” ku iya.
Ba aum nya mega, Abdul Yakub udah dichiri megai pangku pengawa nyadi Presiden Gerempung Melanau Mukah ungkup penggal 2024-2026.
Komiti ke bukai dichiri lebuh nya baka Sapit Presiden Gerempung Melanau Mukah ke mega ADUN Tellian, Royston Valentine, Sekretari Mazira Ramli enggau Tresurer Pengiran Saifudzin Pengiran Mahtar.
“Tanggung pengawa bala Komiti EXCO Gerempung Melanau Mukah tu ila mega deka diatur enggau raban nembiak ngambi bagi awak ulih negutka agi penyerakup gerempung tu,” ku iya. -EDISI UKAS
