OYA: Bemacham perengkaguna dilanggur digaga di taba Kaul Oya dikena ngangkatka dagang temuai ditu sereta ungkup pengelantang peranak dia.
Ku Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah, entara pengawa deka dipejalai baka nyambung selapat nagang tebing tasik tusur di Kampung Kuala Hilir Oya ke deka dipejalai di baruh Ejensi Pemansang Delta Rajang (RADDA).
Ku iya, nyengkaum komponen projek nya ngaga struktur ‘Armour Rock Revetment’ sepemanjai 230 meter enggau sambung walkway sepemanjai 300 meter.
Berebak enggau nya, projek ngaga palan jelatung endur perau orang berikan sangkai, enggau api bangku ti beungkus RM4 juta mega deka diadu.
“Nya alai kami deka nyeleti perengkaguna ditu awak ulih narit ati bala temuai datai sepemanjai taun ngagai taba nya ukai semina nengah ‘one-off’ maya Pesta Kaul aja.
“Kami mega deka ngelanggur ngaga alai endur makai pemakai tasik baka di Melaka.
“Nangkan nya, kami mega deka nirika panggau besai beperabung, balai mayuhguna dikena raban nembiak enggau raban opis ngadu program baka ‘team building’ enggau ke bukai.
Iya bejaku munyi nya lebuh bejadika Pesta Kaul Oya 2024 enggau selapat nagang tebing tasik tusur Pantai Kuala Hilir Oya di taba Kaul Pantai Kuala Hilir Oya kena Hari Minggu.
Pengawa nya dipenyadika Tuai Pemegai Menua Nengeri Sarawak, Tun Pehin Sri Dr Wan Junaidi Tuanku Jaafar disempulang bini, Toh Puan Fauziah Mohd Sanusi enggau Kaban Kunsil Nengeri (ADUN) Tellian, Royston Valentine.
Nambah ke nya, taba endur bedaja enggau perengkaguna dia nyengkaum ‘wedding pool’, landskap, agu enggau Replika Teba Tuanku tauka telaga tuanku beungkus RM4 juta.
Ku iya, sepenyampau RM1.2 juta mega dikena nirika surau dia.
Projek selapat nagang tebing tasik tusur Pantai Kuala Hilir Oya endang beguna endar ngagai peranak dia enggau sida ke diau ngelingi.
Ku iya, selapat sepemanjai 1.4 kilometer nya engkeman endar laban dikemendarka tun Pehin Sri Dr Wan Junaidi Kena 16 April 2016 lebuh iya agi nyadi Menteri Pengeraja Asal Enggau Rampa Menua Malaysia.
“Agih belanja ti udah dikemendarka Tun Pehin Sri maya nya beungkus RM19.5 juta udah di kurang ngagai RM14.4 juta.
“Ari agih belanja RM14.4 juta nya tadi, skop 1.4 kilometer pemanjai enggau 150 semin endur pejalai nya ulih narit ati bala temuai datai meda mata panas padam.
“Pengawa nya udah berengkah diadu kena 15 November 2021 enggau udah tembu 14 November 2023,” ku iya.
Iya mega madah, semilan unit Lebuk Kaul Oya tauka Rumah Kaul mega udah didiri nengah belanja ari Geran Projek Mit Pemansang Menua Pesisir (MRP) penyampau RM50,000.
Dato Sri Fatimah mega madah, Lebuk Kaul Oya ti didiri nengah chara berupan begulai enggau Komiti Pemansang enggau Pengelikun Genturung Pendiau (JKKK) nyadi endur ejensi perintah, peribit sereta sekula ngatur aktiviti baka ‘outreach’, ‘team building’, ko-kurikulum tauka ‘family retreat’. -EDISI UKAS
