BINTULU: Industri betanam betupi patut nunda pemansang nengah chara moden enggau baru.
Menteri Industri Pemakai, Komoditi enggau Pemansang Wilayah Sarawak (M-FICORD), Dato Sri Dr Stephen Rundi Utom madah, opis menteri enggau ejensi nya mega patut seriris nipakka juluk nyungkak industri pemakai.
“Opis Betanam Betupi enggau Gerempung Orang Bumai patut beratika industri pemakai lebuh kitai ngulu pengawa betupi enggau utai tanam.
“Ambik ke chunto, asil bumai ba taun keterubah, kitai bulih lima tan metrik tang empai nyulut ba taun kedua enggau ketiga, nyadi pekara tu patut diberi perati baru dikena nambahka asil nya nengah teknologi baru ti ulih nulung nyungkak agi asil bumai,” ku iya.
Iya nerangka pekara nya maya Program Pesan Menteri Industri Pemakai, Komoditi enggau Pemansang Wilayah Sarawak ditu tadi.
Dato Sri Dr Stephen Rundi mega madah, bala tuai bagi tetiap sitak meseti besaup enggau pangan diri lalu beratika industri pemakai ba sitak sida diri empu dikena nyungkak sektor betanam betupi ba nengeri tu.
“Tetiap sitak patut beratika penanggul kelebih agi ba asil utai tanam sida.
“Berebak enggau nya, nengah pansik enggau chara moden tu ila ulih nambahka agi produktiviti asil utai tanam ti ulih mansutka asil dagang,” ku iya.
Ba pengerami nya mega, Dato Sri Dr Stephen Rundi udah nyuaka pemeri sepenyampau RM70,000 ngagai Kelab Opis Betanam Betupi sereta raban Sapit Menteri Industri Pemakai, Komoditi enggau Pemansang Wilayah Sarawak Datuk Dr Abdul Rahman Ismail seraya Datuk Martin bela bisi nyuaka pemeri sepenyampau RM32,000.
Sama datai, Penyanding Penemu ba Opis Premier (M-FICORD) Tan Sri William Mawan Ikom, Sekretari Mendam M-FICORD Sirai Daha, Residen Bintulu Nyurak Keti enggau Chariman Direktor Opis Betanam Betupi Sarawak Dominic Chunggat. -EDISI UKAS
