Tun Pehin Sri Dr Wan Junaidi Chanselor Baru UNIMAS
Disiarkan pada 16 Oct 2024
Sumber Berita: UKAS
KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar dichiri nyadi Chanselor Universiti Malaysia Sarawak (UNIMAS) ti keempat.
Tuju pengawa chiri tu nampung legasi bala tuai ti nyulut ari Chanselor sebedau tu, iya nya Tun Pehin Sri (Dr.) Abdul Taib Mahmud.
Nyadi siku tokoh ti pintar, visyen sereta mayuh peneleba dalam aturpengawa enggau merintah, Tun Pehin Sri Dr Wan Junaidi dikeandal ulih negapka agi visyen enggau misyen UNIMAS nyadi sebuah universiti bepelasarka komuniti sereta meruan seraris enggau sulu jaku ‘Universiti Komuniti Lestari’.
“Enggau baruh ati, aku nerima tanggungpengawa ke besai tu, Aku sedar ngesan tanggungpengawa nyadi siku Chanselor ba sebuah universiti ukai semina basa tang ngesan tanggungpengawa ke chukup besai.
“Nya ukai semina kelai ngagai universiti tu, tang bejalaika pangku pengawa ti beguna nyadi pengerembai aspirasyen UNIMAS dikena nempa penyulut ba pekara akademik, pemansik sekali ke nya ba renggat nasianal tauka antarabansa.
“Aku mega meri pengaga ati ngagai Opis Menteri Pelajar Tinggi enggau pengawa nyiri tu lalu ngena peluang tu deka bebendar bejalaika pengawa ti patut dikena ngemansang Sarawak sereta menua Malaysia ke dikesayau kitai,” ku iya.
Tun Pehin Sri Dr. Wan Junaidi madah munyi nya sepengudah nerima setipikit dichiri ke disua Menteri Pelajar Tinggi, Dato’ Seri Diraja Dr Zambri Abdul Kadir ba Pengawa Nyiri Chanselor UNIMAS di Bilik Mengadap Utama, Astana Negeri Sarawak ditu, Hari Tiga.
Sama datai iya nya bini Yang di-Pertua Negeri Sarawak Toh Puan Datuk Patinggi Fauziah Mohd Sanusi, Bala Sapit Premier Sarawak Datuk Amar Douglas Uggah Embas enggau Datuk Amar Professor Dr. Sim Kui Hian, Menteri Pelajar, Inovasyen enggau Pemansang Bakat Sarawak Dato Sri Roland Sagah Wee Inn, Sapit Menteri Pelajar, Inovasyen enggau Pemansang Bakat Sarawak Datuk Dr. Annuar Rapa’ee, Sekretari Besai Negeri Sarawak Dato Ahmad Nadzri Mohd Hassan sereta Direktor Opis Direktor Universiti Tan Sri Datuk Seri Panglima Sulong Matjeraie.
Dulu ari nya, Menteri Pelajar Tinggi Dato’ Seri Diraja Dr Zambri Abdul Kadir madah, Tun Pehin Sri Dr. Wan Junaidi nya siku tokoh ti tebangkar nama ti semampai ngulihka penemu, peneleba sereta perspektif global ti nyelai.
Ku Zambri, iya ukai semina ngembuan peneleba ba dunya politik, pengawa polis enggau undang-undang tang kala nyadi siku pengarang prolifik.
"'Kuat berdiri pohon kerana akarnya, kuat akar kerana tanah' nya mih pengarap aku nengah pengawa nyiri Tun Pehin Sri Dr. Wan Junaidi nyadi Chanselor UNIMAS baru. Pengering universiti ditegapka agi enggau pangku pengawa, kerejasama entara UNIMAS enggau Perintah Sarawak sereta Perintah Besai patut ditegap ke agi.
"Tu baka 'condong yang akan menongkat, rebah yang akan menegakkan' Tun Pehin Sri Dr. Wan Junaidi ke dipandang nyadi tuai ti begulai enggau UNIMAS, mantu sereta nyadi lalau ba sebarang perambu universiti dudi hari," ku iya.
Kelimpah ari nya, Mandal Chanselor UNIMAS, Profesor Dr. Ahmad Hata Rasit mega ngaku pemanah Tun Pehin Sri Dr. Wan Junaidi ulih dipeda nengah pengeransing iya maya mangku tanggungpengawa nyadi siku raban polis, luyar, Kaban Parlimen, kaban politik enggau nyadi Tuan Yang di-Pertuan Dewan Negara.
“Pengawa nyadi siku tuai Tun Pehin Sri Dr. Wan Junaidi mega dikelala ba renggat antarabansa enggau ke bukai, ke udah numbuh ASEAN Inter-Parliamentary Caucus lalu dipadu nyadi Chairman Keterubah.
"Tun Pehin Sri Dr. Wan Junaidi siku Kaban Parlimen di ASEAN ke kala dipadu nyadi Chairman Kaukus AIPA ASEAN dua kali iya nya ba taun 2007 enggau 2018.
“Pengawa Tun Pehin Sri ngaul diri ba Pengkap udah meri pangka ngagai pengawa tuai iya. Nya mandangka penyikar, kuasa, pengering enggau visyen Tun Pehin Sri ba pengawa merintah sereta merambu dikena negapka agi organisasyen ti dibetuaika iya,” ku iya baru.
Nengah penampak tu, Tun Pehin Sri Dr. Wan Junaidi enggau rasmi diberi kuasa bejadika pengerami konvokesyen, meri anugerah Degree sereta bejalaika sebarang pengawa baka ke udah disedia dalam Konstitusyen Akta Universiti enggau Kolej Universiti.-EDISI UKAS
