Penemuai Raban Perak Ke Kampung Merembeh Besai Reti
Disiarkan pada 16 Oct 2024
Sumber Berita: UKAS
BAU: Unit Perambu Ekonomi enggau Opis Pelilih sereta Tanah Perak udah nemuai ngagai Kampung Merembeh ditu, kena Hari Dua tu tadi.
Kaban Kunsil Nengeri (ADUN) Serembu, Miro Simuh udah ngelalu penatai raban nya ngagai Sarawak kelebih agi ke Kampung Merembeh.
Ku iya, Kampung Merembeh sebedau tu kala dipadu nyadi Genturung Pendiau Meruan ba taun 2020.
“Penemuai tu nyadi pekara ti beguna dikena ngerapitka kaul sereta negapka agi kerejasama entara nengeri di Malaysia.
“Ba perambu pemansang, perati patut diberi ngagai projek ti meri pangka tinggi ke ulih meri pemaik ngagai semua,” ku iya.
Ku Miro, industri betanam betupi nyadi sektor pemadu manah ke ulih dikemansang.
Ku iya, ladang kupi udah berengkah dipejalai ba Kampung Tringgus enggau projek nupi chapi ba Kampung Merembeh.
Berebak enggau nya, Sapit Direktor Sektoral 2, Unit Perambu Ekonomi Negeri Perak Darul Ridzuan, Intan Shafini Mustafa madah, raban tu dibai ngagai genturung pendiau nya ngambi nemu aktiviti sereta pemansang menua pesisir ba kandang menua luar Perak.
Iya mega nyemetak madah, pengawa nemuai nya meri peluang dikena belajar enggau pangan diri bekaul pemansang ke deka dikunsi.
Sama datai, pengari Residen Bagi Menua Kuching Joseph Liaw, Direktor Mara Sarawak, A Razu Abdul Razak, Direktor Opis Menteri Pemansang Genturung Pendiau enggau Wilayah Perak, Khairul Ridzuan Mat Said, Pegawai Pelilih Bau, Constantine Gerald David Jonas, pengari ari Unit Perambu Ekonomi Sarawak, Redzra Nurruzanna Redzuan enggau Temenggong Komuniti Bidayuh Bagi Menua Kuching, Atok Derop. –EDISI UKAS
