Sarawak Negap Rentayan Global Pansik Paya Kerapa Nengah Seminar LiWeFoR 2024
Disiarkan pada 15 Oct 2024
Sumber Berita: UKAS
KOTA SAMARAHAN: Sarawak dulu sesingkang ba pengawa global ngintu kampung paya kerapa nengah atur Seminar Living Labs for Wetland Research (LiWeFoR) 2024, ke diatur ba Institusyen Pemansik Kerapa Tropika Sarawak (TROPI), Kota Samarahan, Hari Dua.
Seminar tu udah mujur diatur nengah kerejasama ari Universiti Tartu, Estonia, sereta Gerempung Kerapa Malaysia (MPS), ke digulu bala pemansik enggau raban pemegai taruh ari selampur dunya.
Direktor TROPI, Datu Dr. Lulie Melling, madah ke seminar tu nyadi pelasar besai dikena negapka bala pakar ngatur kampung paya kerapa.
Iya mantangka tuju LiWeFoR dikena bekunsi penemu ti bebida enggau strategi ngatur karbon enggau nutrien.
“Kami bisi ati deka ngaga data tebuka ungkup pengawa nyukat gas rumah gadung enggau kebuah rampa menua ba paya kerapa,” ku iya.
Projek LiWeFoR tu udah ngaul kerejasama enggau institusyen tebilang ba renggat antarabansa baka Universiti Helsinki, Finland; Institusyen Teknologi Karlsruhe, Jerman; Institusyen Pemansik Amazon Peru (IIAP), Peru; sereta Universiti Tartu, Estonia ke nerima agih belanja pansik ari Kesatuan Eropah (EU).
Pia mega, Dr. Lulie meransang bala penyereta ngambi sida chakah agi berandau sereta nanggam kaul ti rat dikena napi pemar ke ditapi kampung paya kerapa enggau rampa menua ba serata dunya.
“Kami berasai temegah ati enggau penatai tim pemansik sereta pemegai taruh mayuh sektor.
“Penganda kita semua beguna amat dikena nyerungkai sereta mutar inovatif ungkup kampung paya kerapa dudi hari ti meruan agi,” ku iya.
Iya meri pengaga ati ngagai tim TROPI enggau Prof Ulo Mander ari Universiti Tartu ti ransing udah ngemujurka seminar nya.
Pia mega, Dr. Lulie ngarap nengah seminar tu ulih meri pangka ti positif sereta peneleba ke ulih meri pemaik ngagai semua penyereta sereta ulih mantu pengawa ngintu ekosistem paya kerapa ba timpuh panjai.
Menua baka Jerman, Peru, enggau Finland bisi ngambik bagi ba seminar tu ke meri pangka ke besai nuju pengawa ngintu kampung paya kerapa enggau meruan ba renggat global.-EDISI UKAS
