KUCHING: Pengawa nyuaka projek nyeleti begunan Kunsil Nengeri (DUN) Sarawak ke diangkat nyadi Palan Seni Sarawak deka diatur kena 2 Mei tu.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, projek nyeleti palan nya disadang tembu dua taun setengah.
“Projek Palan Seni Sarawak di begunan DUN lama nya udah disua ngagai kunteriktor ngambi sida ulih nyeleti palan nya nyadi Palan Seni Sarawak maya 2 Mei tu lalu disadang tembu dua taun setengah,” ku iya.
Iya nerangka pekara nya lebuh dirandau raban media sepengudah ngulu Pengerami Ngintu Aidilfitri diatur Majlis Seni Sarawak, Hari Enam tu tadi.
Iya mega madah, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg deka datai enggau ngemataka pengawa nyua projek nya ngagai kunteriktor ila.
Dato Sri Abdul Karim ke mega Menteri Nembiak, Lumba enggau Pemansang Orang Dagang madah, Perintah Sarawak deka meri belanja RM100 juta dikena ngemujurka projek nya.
“Perintah Sarawak deka ngena belanja penyampau RM100 juta dikena nyeleti begunan DUN enggau begunan ‘lapau’ nya,” ku iya nambah.
Nangkan nya, bisi empat buah serikat deka nyaup bejalaika projek nya ila.
Ba pengerami nya, Dato Sri Abdul Karim enggau Sapit iya, Datuk Snowdan Lawan mega sama betanda lebuh bemukun lemai nya.
Sama bela datai, Tuai Pegawai Eksekutif Kaunsil Seni Sarawak Dayang Mariana Abang Bolhassan enggau Sekretari Mendam Menteri Dagang Temuai, Industri Kreatif enggau Seni Pemerindang Sarawak (MTCP) Datu Sherrina Hussaini sereta bala temuai basa ke bukai. -EDISI UKAS
