Program MDMJ Library Open Day 2024 Ngangkat Literasi Komuniti
Disiarkan pada 11 Oct 2024
Sumber Berita: UKAS
BINTANGOR: Program MDMJ Library Open Day 2024 disambut enggau richah sereta mandangka pengeransing dikena ngangkat literasi enggau pelajar ngagai komuniti menua nya.
Ku Kaban Kunsil Nengeri (ADUN) Meradong Datuk Ding Kuong Hiing madah, tuju program tu diatur dikena meransang komuniti menua nya nemuai ngagai librari sereta ngena perengka ke udah disedia nengah chara efektif.
Program tu seriris enggau juluk ati dikena nempa modal insan ti nyulut sereta nerenakka daya idup belajar sepanjai idup, ku Datuk Ding maya bejadika program tu.
Iya mega ngemeratka pemesai guna librari tu ti nyediaka servis literasi ke ulih ngerinduka ati ti inklusif, lebih agi ba era digital kemaya hari.
Iya madah munyi nya maya bejadika Program MDMJ Library Open Day 2024 ti Bepalan ba Librari Mensia Mayuh Bintangor, kena Hari Empat tu tadi.
Kelimpah ari nya, program tu mega nyukung Juluk Pemansang ti Meruan (SDG) baka SDG 3 (Good Health & Well-being), SDG 4 (Quality Education) enggau SDG 11 (Sustainable Cities & Communities).
Siti program besai ti matak ka ati iya Program STEM (Science, Technology, Engineering, and Mathematics), asil kerejasama enggau Tabung Ekonomi Gagasan Anak Sarawak (TEGAS) meri penyedar bekaul enggau pemesai guna bidang sains enggau teknologi ninting hari.
Ba program nya, Datuk Ding udah nyuaka pemeri bantu khas beungkus RM10,000 ngagai Librari Mensia Mayuh Bintangor ungkup pemansang infrastruktur sereta bejalaika program ninting taun librari. -EDISI UKAS
