KUCHING: Transformasyen digital ke ditengkebang Perintah Sarawak deka nyaup nengeri tu ngaga kandang mengeri lebih agi mansang, strategik enggau inklusif.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, transformasyen tu mai Sarawak ulih majak mansang.

Ku iya, Sarawak berengkah meranakka puku ngaduka mengeri pintar ke nyadi inisiatif ngatur mengeri enggau nyungkak pemanah tikas pengidup mensia mayuh.

"Artificial Intelligence (AI) enggau ‘Internet of Things’ (IoT) benung dipasukka ba sistem infrastruktur ba tuju nyikap penyikar ba pengawa bekaul ngatur pejalai ba jalai alun, nyadung kuasa enggau servis kereja perintah," ku iya madah.

Iya bejaku munyi nya maya Forum Dudi Hari Sarawak ditu, Hari Empat.

Datuk Patinggi Abang Zohari mega madah, sistem trafik pintar endang udah digaga ba mengeri besai dikena ngurangka penyekut jalai alun enggau ngurangka pemansut karbon.

Bekaul pekara nya, ku iya, sistem tu deka bekenaka data tekala nya matau pejalai trafik.

"Inisitif mengeri pintar ukai semina nyungkak tikas pengidup ba mengeri tang bela seriris enggau juluk ati Sarawak ngaga mengeri ti meruan ke ulih mai pemansang enggau pengelantang pengidup," ku iya madah baru.

Bela datai maya nya Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr Sim Kui Hian, bala Sapit Menteri Sarawak, Sapit Sekretari Perintah Sarawak Datuk Amar Mohamad Abu Bakar Marzuki, bala Sapit Sekretari Perintah Sarawak, Datu Dr Muhammad Abdullah Zaidel (Pengatur Ekonomi enggau Pemansang), Datu Hii Chang Kee (Operasyen) enggau Datu Buckland Bangik (Administresyen), Luyar Besai Sarawak Datu Saferi Ali, bala Tuai Opis Perintah enggau pemesai ke bukai. -EDISI UKAS