MIRI: Perintah Sarawak udah ngubah undang-undang dikena ngelaku enggau ngemansang projek Ngurang, Nguna enggau Nyimpan Karbon (CCUS) ba kandang tasik Sarawak.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kompeni Petroleum Sarawak Berhad (PETROS) udah dichiri ngatur pengawa ngelaku enggau ngaga palan nyimpan karbon nya.

Naka ke diatu ku ya, bisi tiga iti projek CCUS nyengkaum siti digaga begulai enggau kompeni minyak enggau gas ari Jepun.

"Ubah undang-undang tu ngemuntangka kitai ngaduka pengawa nyimpan karbon ba kandang tasik Sarawak.

“PETROS deka ngatur pengawa ngelaku enggau ngaga palan nyimpan karbon. Sida ke bukai ti bisi ati ngereja projek CCUS tau betanya ngagai PETROS," ku iya madah.

Iya bejaku munyi nya maya pengerami muka Indu Opis Operasyen Ulu Shell Malaysia (OSSM) ditu, Hari Tiga.

Dulu ari nya, Datuk Patinggi Abang Zohari minta Shell besaup enggau PETROS ba pengawa bekaul minyak enggau gas di Sarawak.

Ku iya, Shell bakih strategik perintah Sarawak ti udah ngubah pemansang mengeri Miri.

"Aku enggau lantang ati madahka SHELL nyadi bakih kitai ngemansang Sarawak.

"Kita begulai enggau Perintah Sarawak ngubah Miri ari menua ke mit diatu jauh mansang.

“Aram kitai majakka singakang tu lebih agi ba pemansang kuasa gadung baikka ba CCUS tauka teknologi gadung ke bukai," ku iya madah baru.

Sama bela datai maya nya Sapit Premier Sarawak Datuk Amar Prof. Dr Sim Kui Hian, Menteri Pengangkut Sarawak Dato Sri Lee Kim Shin, Menteri Utiliti enggau Telekomunikesyen Sarawak Dato Sri Julaihi Narawi, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri, Chairman Shell Malaysia Siti Hurrairah Sulaiman sereta pemesai ke bukai. - EDISI UKAS