Program Pemerindang Beserimbai Pengerami Ngintu Hari Pengada Tun Pehin Sri Dr Wan Junaidi Mandang Penyerakup Sarawak
Disiarkan pada 09 Oct 2024
Sumber Berita: UKAS
KUCHING: Program Pemerindang ke udah ditusun maya Majlis Jamuan Teh beserimbai Pengerami Ngintu Hari Pengada Yang di-Pertua Negeri Sarawak, Tun Pehin Sri Dr Wan Junaidi Tuanku Ja’afar kena 13 Oktober tu deka mandangka penyerakup pupu raban bansa enggau daya idup ke bisi di nengeri tu.
Sapit Menteri di Opis Premier Sarawak (Undang-undang, MA63 enggau Kaul Perintah Nengeri-Perintah Besai) Datuk Sharifah Hasidah Sayeed Aman Ghazali madah, program ke ditusun nya seriris enggau Tun Pehin Sri Dr Wan Junaidi ke nyadi kelai penyerakup rayat di Sarawak.
“Aku deka madah, taun tu kitai ngatur program pemerindang bepelasarka penyerakup enggau daya idup pupu bansa ti deka dipandang maya Majlis Jamuan Teh," ku iya madah.
Iya madah munyi nya ba program Juh Randau ke diatur Unit Komunikasi Awam Sarawak (UKAS) di Begunan Baitulmakmur ditu, Hari Tiga.
Maya pengerami nya ila, Tun Pehin Sri Dr Wan Junaidi deka betemu enggau 150 penerima bala nembiak ari Rumah Seri Kenangan, Rumah Nembiak Toh Puan Norkiah, Sekula Tunas Bakti Kuching, Taman Seri Puteri enggau Desa Bina Diri.
Iya ke mega Menteri Pengatur Majlis Jamuan Teh beserimbai enggau Pengerami Nyambut Hari Pengada Tun Pehin Sri Dr Wan Junaidi madah, naka ke diatu pengawa nyikap pengerami nya mujur dipejalaila.
Sekeda program bukai ke bisi diatur maya nya ila, Pengerami Selamat, Khutbah Khas, Pengerami Selamat Pengarap Bukai, Istiadat Perbarisan dan Rapat Raksasa, Istiadat Pengurniaan Darjah-Darjah Kebesaran Negeri, Pengerami Jamuan Negeri enggau Pengerami Jamuan Teh. -EDISI UKAS
