GKCDA Ransing Ngemansang Menua Pesisir
Disiarkan pada 09 Oct 2024
Sumber Berita: UKAS
TEBEDU: Agensi Pengatur Pemansang Greater Kuching (GKCDA) ransing deka ngemansang menua pesisir.
Menteri Pelajar, Inovasyen enggau Pemansang Pengelandik Sarawak, Dato Sri Roland Sagah Wee Inn madah, kenyau ditumbuh kena 29 September 2022, GKCDA udah mayuh ngelangkar projek ba semilan sitak Kunsil Nengeri (DUN) berengkah ari DUN Opar ngagai DUN Balai Ringin.
Ku iya nyentuk bulan Oktober 2024, penyampau projek ke udah dikemendar dipejalaika ba Renggat 1 bisi 372 projek ti dibagi ngagai 201 projek Sitak Kuching enggau 171 projek di Sitak Serian.
“DUN Bukit Semuja aja bisi 47 bansa projek ti deka digaga ke beungkus RM152 juta,” ku iya.
Iya madah munyi nya maya Pengawa Bejadi enggau Nyuaka Projek Tembu GKCDA ditu, Hari Tiga.
Iya mega madah, projek nyambung bekal ai paip ba Kampung Sorak enggau Kampung Belimbing A ngena ungkus belanja sepenyampau RM182,695 enggau RM163,250 udah tembu.
Bekaul enggau projek ke udah dilangkar sebedau tu, Kaban Kunsil Nengeri (ADUN) Tarat nya madah, bisi enam iti projek udah diberi agih belanja, 48 projek udah diberi tinda ngagai kunteriktor, 34 projek ba renggat nyuaka tinda lalu 282 projek ba renggat perambu enggau dokumentasyen.
Sama bisi datai maya nya ADUN Bukit Semuja John Ilus, ADUN Tebedu Dr Simon Sinang Bada, ADUN Serembu Miro Simuh, Residen Sitak Serian Caroline Cleophas Joseph, Pegawai Tadbir Khas GKCDA Datu Ik Pahon Joyik, Sekretari Politik ngagai Premier Sarawak John Nyigor enggau Damian Rejek sereta temuai dipebasa ke bukai. -EDISI UKAS
