Perintah Sarawak Chakah Nyungkak Pengelikun Ba Padang Bilun
Disiarkan pada 09 Oct 2024
Sumber Berita: UKAS
KUCHING: Perintah Sarawak ransing deka nyungkakka pekara pengelikun ba padang bilun lebih agi penerebai domestik dikena ngemunaska penyalah mai dadah tama ngagai nengeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ketegal nya, perengka dikena meresa ti ngena teknologi Artificial Intelligence (AI) deka digaga ba padang bilun.
“AI beguna bendar dikena meresa penyalah mai dadah, lebih agi ba padang bilun.
“Kitai deka meda padang bilun domestik likun ari penyalah mai dadah tama ke Sarawak,” ku iya.
Iya nerangka pekara nya ba aum media udah pengawa bejadika Forum Khas Penyalah Narkotik 2024 ditu, kena Hari Dua tu tadi.
Kelimpah ari nya, Premier Sarawak madah, penyampau kes dadah di Sarawak udah nurun bepun ari pemanah kerejasama perintah nengeri enggau Polis Diraja Malaysia (PDRM).
Taja pia, Datuk Patinggi Abang Zohari mengkang ngansak mensia mayuh, PDRM sereta agensi bekaul besaup enggau pangan diri nentuka pengelikun menua tu.
Forum Khas Narkotik 2024 ke diatur Opis Pemansik Penyalah Narkotik (NCID) enggau OSC-MIDS dikena mutar sereta chara nagang dadah.
Sama bisi datai maya nya Sapit Premier Sarawak, Datuk Amar Profesor Dr Sim Kui Hian, Menteri Raban Indu, Nembiak Mit enggau Pengelantang KOmuniti Sarawak Dato Sri Fatimah Abdullah, Sapit Kepala Polis Menua Datuk Seri Ayob Khan Mydin Pitchay, Sapit Menteri Pemansang Indu, Nembiak Mit enggau Pengelantang Komuniti Datuk Mohammad Razi Sitam sereta temuai dipebasa ke bukai. -EDISI UKAS
