Ambi Peranak Sarawak Dulu Nyadi Pengajar
Disiarkan pada 08 Oct 2024
Sumber Berita: UKAS
LUNDU: Opis Menteri Pelajar Malaysia dipinta ngambi peranak Sarawak dulu ari orang menua bukai nyadi pengajar di nengeri tu.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengajar ke suah minta pulai gawa ngagai menua diri empu lebih agi pengajar ari Semenanjung Malaysia deka ngenataika penanggul bukai.
Ku iya, pekara tu enda nyadi ba pengajar Sarawak empu.
“Enti peranak Sarawak empu, sida enda minta pindah ke bukai. Enti pindah pan semina ba Sarawak tu aja.
“Nya alai, kitai ngarapka pengajar ditu endang peranak Sarawak empu.
“Aku udah minta Menteri Pelajar, Inovasyen enggau Pemansang Pengelandik Sarawak Dato Sri Roland Sagah Wee Inn ngaduka pekara tu lalu diatu iya benung berandau enggau Opis Menteri Pelajar,” ku iya madah maya aum media sepengudah Pengerami Bejadika Akademi Aerospace di CENTEXS Lundu ditu, Hari Dua.
Empai lama tu tadi, Komiti Servis Pelajar (SPP) udah muka pengawa khas ngambi pengajar Sarawak ngagai nengeri bukai.
Berebak enggau nya, Dato Sri Roland maya dipinta nerangka pekara nya madah, SPP enti nunda semina nerima rayat Sarawak aja ketegal lebih 15,000 iku udah ngisi peminta nyadi pengajar.
“Diatu, sida deka meri awak tu ngagai orang ukai peranak Sarawak alai aku enda tentu setuju enggau pekara tu.
“Kebuah pia laban kitai udah berandau enggau sida lalu randau nya enti nunda dipenyadi nitihka pematut,” ku iya nerang. -EDISI UKAS
