NREB Bejadi Manual Atur Pekara Wang, Nyungkak Pengelurus & Akauntabiliti
Disiarkan pada 08 Oct 2024
Sumber Berita: UKAS
KUCHING: Opis Pengeraja Asal enggau Rampa Menua (NREB) udah bejadika Manual Atur Pekara Wang, Hari Dua.
Sapit Menteri Kuasa enggau Pemeruan Rampa Menua Sarawak, Datuk Dr. Hazland Abang Hipni madah, pengawa nya besai reti dikena nyendiaka malin ti nyemetak ungkup pengawa bekaul belanja, nentuka undang-undang dititih sereta nyungkak pengelurus enggau akauntabiliti.
Ku iya, tu mega nyaup ngurangka penyalah enggau pengilap, nyungkak penyikar operasyen lalu ngemuntang pengawa audit.
"Enggau jaku bukai, tu deka nentuka pengawa ngatur belanja dipejalaika enggau integriti, sikar sereta nitih atur.
"Manual tu nyadika malin semua staf NREB ba pengawa ngatur belanja enggau akaun," ku iya madah.
Iya madah munyi nya maya Pengerami Ngintu Hari Integriti Opis Pengeraja Asal enggau Rampa Menua 2024 ditu, Hari Dua.
Berebak enggau nya, Datuk Dr Hazland mega madah, pengawa nyerenih baru organisasyen NREB udah dikemendarka Kabinet Nengeri ba bulan Februari 2024.
"Pengawa ngadu baru struktur ke baru tu ulih meri awak ngagai NREB ngemanahka agi tikas pengawa sereta tanggungpengawa ke bisi bekaul enggau atur Mindah Autonomi MA63 ungkup Pengatur Rampa Menua," ku iya madah baru.
Ba pengerami ke nya, Datuk Dr Hazland dipebasa nyuaka Anugerah Servis Nyulut ngagai staf NREB.
Sama bisi datai maya nya Sekretari Mendam Opis Menteri Rampa Menua enggau Pemansang Mengeri Sarawak, Abang Ahmad Abang Morni, Controller Kualiti Rampa Menua Sarawak Jack Liam, Direktor Opis Parit enggau Entali Ai Sarawak Datu Ir. Ts. Ahmad Denney Ahmad Fauzi sereta temuai dipebasa ke bukai. -EDISI UKAS
