SIBU: Presiden Parti Pesaka Bumiputera Bersatu (PBB) Datuk Patinngi Tan Sri (Dr) Abang Abdul Rahman Zohari Tun Datuk Abang Openg enda ngenggai nyangka deka nganjung chalun biak ari Sayap Raban Nembiak ke baru ditumbuh parti nya bediri maya Pengawa Bepilih Nengeri (PRN) nangkan tu ila.

Iya ke mega Premier Sarawak madah, taja pia chalun nya meseti ngembuan penau lalu dikerindu semua lebih agi pengundi empu.

"Enti semua tu bisi, enda ngira sapa tauka endur, enti rayat rindu ke sida, nadai kebuah kitai enda nganjung sida nyadi chalun," ku iya maya dirandau media sepengudah bejadika Konvensyen Raban Nembiak PBB ditu, Hari Minggu tu tadi.

Iya mega madah, ninting maya pengawa bepilih diatur, 30 peratus chalun PBB endang chalun baru lalu orang lama ti mayuh penemu enggau peneleba deka nyaup orang baru nya.

Taja pia ku iya ke mega Chairman Gabungan Parti Sarawak (GPS), raban nembiak PBB meseti dilatih enggau chukup ngambika ulih begulai enggau rayat pupu bansa di Sarawak.

Iya mega minta raban nembiak enda kelalu gagit ba politik ngambika ulih nyeliah diri salah singkang nyentuk nyanggup beterabaika jalai pengarap ketegal minta sukung.

"Tu dikeenggai kitai laban kitai ngemeratka pengelikun nengeri Sarawak," ku iya sambil madah bala nembiak patut landik nambah penemu lebih agi bekaul teknologi ti ulih nyaup rayat.

Kelimpah ari nya iya madahka penumbuh Sayap Raban Nembiak PBB nyadi sejarah ngagai politik Sarawak laban meri awak ngagai nembiak ke beumur 18 ngagai 28 taun nyadi raban PBB ti bela nyaup pemansang ukai semina PBB aja tang mega GPS.

Nambahka jaku iya, Premier Sarawak madah, PBB ngemeratka latih strategik baka Sains, Teknologi, Engineering enggau Matematik (STEM), 'aerospace', ekonomi gadung bepelasarka kuasa ulih dikena baru, betanam betupi moden enggau semi konduktor.-BERNAMA