186 Raban Nembiak Sarawak Ngulu Program ‘Jelajah Belia Rukun Negara’ 2024
Disiarkan pada 06 Oct 2024
Sumber Berita: UKAS
KUCHING: Sepenyampau 186 penyereta udah ngulu program ‘Jelajah Belia Rukun Negara’ ke diatur Opis Menteri Penyerakup Bansa pengelama dua hari ba sebuah hotel tebilang ditu, berengkah ari Hari Enam tu tadi.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, program renggat keterubah ba Sarawak digaga khas dikena ngangkat literasyen enggau meretika Rukun Negara ngagai raban nembiak.
Ku iya , nyadi siku tuai dudi hari , bala nembiak meseti diseridi nengah chara pratikal dikena ngempung juluk enggau lima prinsip Rukun Negara dalam pengidup sida ninting hari.
“Kitai deka nentuka bala nembiak di Sarawak ulih nyadi tuai ke nukar penuduk kitai, kelimpah, ulih ngayanka bala anak Sarawak pemadu manah ari sukut akademik, pengelandik sereta moral nengah chara meruan, ti mungkur fizikal, runding enggau semangat,” ku iya.
Iya madah munyi nya maya bejadika Pengerami Nutup Semarak Penghayatan Rukun Negara: Jelajah Belia Rukun Negara Zon Sarawak 2024, Hari Minggu.
Nerang silik, ku Dato Sri Fatimah, Sarawak nyadi menua pemungkal ti ngemeran Modul Meretika Rukun Negara ti bepelasarka tiga pekara besai iya nya nilai, chara sistematik enggau integrasyen sereta meri empas ngagai komuniti.
Modul tu ku iya, digaga Opis Penyerakup Menua enggau Integrasyen Nasional (JPNIN) begulai enggau Serakup IKRAM Malaysia (IKRAM) nengah chara ngambi input sereta penemu ari sekeda pakar konstitusyen enggau Rukun Negara sereta mayuh bengkah gerempung ukai dikuasa perintah (NGO).
Berebak enggau nya, Dato Sri Fatimah merambu JPNIN ulih bekerejasama enggau Kaunsil Pemansang Rama (MPS) Sarawak ba baruh opis menteri iya dikena ngatur program baka tu ti mungkur raban nembiak ba genap zon menua tu.
"Kami (MPS) bisi program baka Randau Solidariti ke alai kami bejalai ngagai endur ke udah ditetapka, lalu JPNIN ulih bela ngambi bagi ba program mini tu, ke alai kami fokus ngagai raban nembiak.
“Kelimpah ari nya, bisi program bukai ba Program Mutarka Isu dadah enggau Substance ngagai raban nembiak nyengkaum Program Penyedar Advokasi Pelajar Seksual (KAPS) ti ngaul bala nembiak, apai indai sereta komuniti.
“MPS ulih nyadi pengatur besai nyema JPNIN bisi penanggul ari sukut belanja ba sekeda kandang menua,” ku iya baru.
Sama datai ba pengerami nutup nya Direktor JPNIN Sarawak Dirwana Azool, Tuai Kluster Penyerakup Nasional IKRAM ke mega Direktor Projek Jelajah Belia Rukun Negara Dr Sabariah Baharun, Direktor Penyerakup Rama enggau Integrasyen Nasional JPNIN Fairojibanu Zainal Abidin sereta Sekretari Eksekutif MPS Riziandy Nawawi.-Edisi UKAS
