Pekit Muaythai Trofi TYT Sarawak Pelasar Nempa Atlit Betikas Dunya
Disiarkan pada 06 Oct 2024
Sumber Berita: UKAS
KUCHING: Pengawa ngatur bemacham pekit muaythai betikas antarabansa beguna endar ungkup bala atlit biak Sarawak bulih peneleba besemekih enggau penyereta ari menua luar.
Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, nengah pekit baka tu Sarawak ulih nempa atlit muaythai ti tebilang enggau ulih besemekih nyentuk renggat antarabansa.
Bechuntoka pengawa ngatur Pekit Muaythai Trofi Tuan Yang Terutama (TYT) Yang di-Pertua Negeri Sarawak 2024, iya madahka penyereta mayuh atlit menua ba pekit nya mandangka lumba nya majak dikerindu raban nembiak di nengeri tu.
“Mayuh rayat Sarawak rindu enggau muaythai.
“Nengah pekit tu, kitai ulih nempa bala atlit ke landik sereta besemekih ngagai renggat antarabansa baka Mohamad Johan Ghazali tauka Jojo.
“Tu mandangka anak Sarawak ukai semina jaguh kampung tang jaguh antarabansa,” ku iya madah.
Iya madah munyi nya maya bejadika Pekit Muaythai Trofi TYT 2024 di Panggung Udara, Jalai Taman Budaya, Hari Enam.
Dato Sri Abdul Karim mega muji inisiatif Gerempung Muaythai Nengeri Sarawak (PMNS) ti naka ulih ngangkatka lumba nya nyentuk nyadi kuasa dalam menua taja baru dikemansang pengelama 10 taun.
Pekara tu nyata dipeda pengudah Sarawak nurai sejarah nyadi champion besai lumba nya ba Lumba Malaysia (SUKMA) Ke-21, bulan Ogos pengudah bulih lima midul emas, empat pirak enggau siti engkeraju.
Nya alai, iya meri jamin deka terus nyukung sebarang aktiviti muaythai nyengkaum lumba bukai ngambi Sarawak terus nyulut ba arena lumba dikena nyapai status kuasa lumba dalam menua manggai taun 2030.
Ba pekit nya, Kelab Muaythai Kenyalang udah dipadu nyadi champion besai Pekit Muaythai Trofi TYT Yang Di-Pertua Nengeri Sarawak 2024.
Ungkup rikod, bisi 200 penyereta ari bemacham kelab menua ari selampur menua nyengkaum 30 penyereta ari Brunei Darussalam, Indonesia, Thailand enggau Iran ngambi bagi ba pekit serak tu.
Sama datai Datuk Bandar Dewan Bandaraya Kuching Utara Hilmy Othman, Presiden Gerempung Muaythai Negeri Sarawak Jumaat Ibrahim sereta temuai dipebasa ke bukai.
Pekit ti belabuh kenyau 3 Oktober tu tadi tembu sehari tu. -EDISI UKAS
