BETONG: Palan Latih, GIATMARA di Spaoh dipelabaka deka nerima nembiak keterubah manggai Januari taun ti deka datai.
Sapit Premier Sarawak, Datuk Amar Douglas Uggah Embas madah, opis betanam betupi nya suba udah diadu baru lalu dikemanah dikena nyadi palan latih pengelandik enggau teknikal.
Ku iya, palan tu nyediaka dua kus pandak iya nya elektrik enggau bejait sereta siti kus panjai iya nya pansik elektrik.
“Kitai ngagihka sepenyampau RM600,000 ungkup pengawa ngemanah.
“Arapka tu deka tembu digaga dikena nerima 20 nembiak ba renggat keterubah ari sitak Bukit Saban manggai taun ti deka datai,” ku iya udah ngulu randau penerang bekaul pengawa ngemanahka opis pelilih mit Spaoh ditu, Hari Enam.
Datuk Amar Douglas mega madah, palan tu deka nempa awak ngagai nembiak ke empai bisi gawa nerima latih pengelandik.
“Tu beguna bendar. Kitai deka nembiak bisi awak ngembuan pegelandik ba dua bidang tu enggau bidang bukai ke disediaka jemah ila.
“Nengah mayuh bengkah aktiviti ekonomi jemah ila, bisi awak gawa dalam industri elektrik, pengawa berumah enggau pemansang tanah ungkup sida,” pia ku iya.
Bela datai, Direktor GIATMARA Sarawak Abdul Halim Sarojai enggau Engineer Opis Kereja Raya (JKR) Betong Jason Ng. -EDISI UKAS
