Sarawak & Brunei Negap Kaul Nengah STATOB
Disiarkan pada 04 Oct 2024
Sumber Berita: UKAS
BANDAR SERI BEGAWAN: Penumbuh Opis Dagang Temuai Sarawak Brunei (STATOB) di Pavo Point ditu, deka negapka agi kaul enggau kerejasama Sarawak enggau Brunei Darussalam.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, STATOB nyadi pelasar ngelakuka dagang temuai enggau daya idup, sereta ngerandang awak baru ba sektor ekonomi enggau dagang temuai ti deka maik pemaik sereta penguntung ngagai dua buah menua nya.
Ku iya madah, inisiatif nya ukai semina mandangka pemeras Sarawak nempa kerejasama ti tegap agi enggau menua sepiak, tang bela ngayangka pengeransing nengkebang kaul ba rantau Asia Tenggara.
Iya madah munyi nya maya bejadika STATOB ditu, kena Hari Empat tu tadi.
Nangkan nya ba aum media, Datuk Patinggi Abang Zohari madahka Sarawak deka meranakka puku RM6 bilion dikena ngaga jalai alun ari Miri ngagai Lawas.
Ku iya, projek nya dikeandal ulih ngemuntangka pejalai ngagai menua bukai di Sarawak nengah Brunei.
“Ke bendar iya jalai tu bepun ari ASEAN Bridge di Miri terus ke Brunei lalu nuju Limbang enggau Lawas. Tu mega ngelinggi menua endur Gerempung Pelajar, Saintifik enggau Daya Idup (UNESCO) Mulu.
“Kitai mega bisi jalai baru entara Marudi enggau ke Long Terawan, udah nya nyambung jalai di Limbang.
“Reti iya, nengah jalai tu, kitai ulih nempa siti rentayan ngelinggi selampur endur nya lalu ngemuntang bala temuai nemuai ngagai Brunei enggau Sarawak,”ku iya madah ba aum media sepengudah pengerami bejadi.
Madah enggau nyemetak, ku Datuk Patinggi Abang Zohari endur projek nya uda ditentuka lalu disadang ulih tembu ba taun 2030.
"Pengawa ngaga projek deka belabuh taun ke deka datai lalu disadang ulih tembu dalam kandang enam taun, nambahka jalai ngelawa Limbang enggau Lawas tu beringkat, nisi bukit.
"Kitai enggai nyungkur bukit tu laban deka nyaga ekosistem enggau rampa menua," ku iya madah baru.
Ba pengerami nya, Datuk Patinggi Abang Zohari dipebasa meda pengawa besilih Sempekat Pemereti Ati (MoU) Sarawak Biodiversity Council enggau Kompeni Asnika Of Brunei, Serakup Orang Dagang Melayu Brunei enggau Balai Dagang Bumiputera Sarawak Malaysia lalu ditangkan Sarawak Entrepreneur Association enggau Young Entrepreneur Association Brunei.
Sama datai ngerami sejarah nya Sapit Premier Sarawak Datuk Amar Awang Tengah Ali Hasan enggau Datuk Amar Profesor Dr. Sim Kui Hian, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Menua Sarawak Dato Sri Dr. Stephen Rundi Utom, Menteri di Opis Premier Sarawak Dato Sri John Sikie Tayai, Menteri Pengangkut Sarawak Dato Sri Lee Kim Shin, Sekretari Perintah Sarawak Datuk Amar Mohamad Abu Bakar Marzuki, Luyar Besai Sarawak Datu Saferi Ali, Sekretari Pekara Wang Sarawak Dato Sri Wan Lizozman Wan Omar sereta Bala Sapit Sekretari Perintah Sarawak Datu Dr. Muhammad Abdullah Zaidel (Perambu Ekonomi enggau Pemansang) sereta Datu Hii Chang Kee (Operasyen).
Sama bisi datai maya nya Menteri di Opis Menteri Besai ke mega Menteri Ngetan II Brunei Darussalam Pehin Datu Lailaraja Mejar Jeneral (Pincin) Dato Paduka Seri Awang Halbi Mohd Yussof, Menteri di Opis Menteri Besai ke mega Menteri Pekara Wang enggau Ekonomi II Dato Seri Setia Dr. Awang Mohd Amin Liew Abdullah, Menteri Pekara Menua Luar II Brunei Darussalam Dato Seri Setia Erywan Pehin Datu Pekerma Jaya Mohd Yusof, Menteri Pengeraja Asal enggau Dagang Temuai Brunei Darussalam Dato Seri Setia Dr Abdul Manaf Metussin sereta Menteri Pengangkut enggau Infokomunikasyen Brunei Darussalam Pengiran Dato Seri Setia Shamhary Pengiran Dato Paduka Mustapha.-EDISI UKAS
