Perintah Sarawak Deka Ngaga Bilun Perang Dunya Kedua Nyadi Artifak Sejarah
Disiarkan pada 02 Oct 2024
Sumber Berita: UKAS
KUCHING: Perintah Sarawak benung beratika pengulih ngaga Bilun Perang ‘Zero’ Jepun ke ditemu enda jauh entara Sabah-Sarawak di Lawas nyadi artifak sejarah.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, Opis Muzium Sarawak deka dipinta ngatur pengawa bekaul sebedau nama-nama pemutus digaga.
“Kami deka madah ngagai Opis Muzium ngambika mansik bilun nya dikena nentuka pematut ngaga iya nyadi artifak sejarah," ku iya.
Iya madah munyi nya maya dirandau media sepengudah pengerami Festival 'What About Kuching' (WAK) 2024: 'Call of the Tribes' (COTT) ti bepalan The Old Court House ditu, kena Hari Dua tu tadi.
Madah enggau nyemetak, ku Dato Sri Abdul Karim, bisi dua buah bilun perang nyengkaum sebuah nyangka enggi Amerika ke ditemu di Lawas.
“Kami nganti ripot sereta timbal ari Opis Muzium,” ku iya madah. -EDISI UKAS
