Birokrasi Dalam Pejalai Projek Patut Dikurang
Disiarkan pada 29 Sep 2024
Sumber Berita: UKAS
MIRI: Birokrasi sistem atur gawa perintah dalam bejalaika projek di Sarawak patut dikurangka agi nentuka pejalai langgur pemansang lanchar.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, ngansak bala pegawai bepangkat perintah ngembuan semangat ngerumban pemansang di Sarawak.
"Peda sekula kitai, klinik kitai lalu nguji ngemandakka birokrasi.
“Menteri Besai bisi ba mua kitai, pia mega, kitai ngarap bala pegawai bepangkat perintah seriris enggau pengeransing ti dipandangka Menteri Besai, ngelengkaska agi pemansang di Sarawak,” ku iya madah.
Iya madah munyi nya maya Pengerami Makai Lemai serimbai Pejalai Gawa Yang Amat Berhormat Menteri Besai ke Sarawak ditu, Hari Enam.
Nampung baru jaku iya, Premier Sarawak mega nyemetak madah ke Sarawak deka terus mantu perintah besai nyapai ekonomi tumbuh ke ulih mai ubah ngagai menua.
"Aku ulih meri jamin ngagai kita, Sarawak deka ngenegapka pekara tu (penegap politik), lalu nama penegap ke dikembuan kitai, kitai patut bekunsi enggau selampur Malaysia lalu nya meh juluk semua perintah kitai," ku iya nyemetak.
Ba pengerami ke sama, Menteri Menteri Dato' Seri Anwar Ibrahim nerima tepa Parang Ilang ke disua Temenggong Bansa China bagi Menua Miri Yong Vui Seng, Temenggong Orang Ulu bagi Menua Miri Elizabeth Deng, Pemancha Mohamed Abang Othman, Residen bagi Menua Miri Jamalie Busri enggau Bala Tuai Raban Bansa enggau Tuai Komuniti (KMKK) Miri.
Sama datai, Yang Di-Pertua Dewan Negara Dato Awang Bemee Awang Ali Basah, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, Menteri Pemansang Indu, Ruang Bilik enggau Komuniti Dato Sri Nancy Shukri, Menteri Dalam Menua Datuk Seri Saifuddin Nasution Ismail, Menteri Pengangkut Sarawak Dato Sri Lee Kim Shin, Bala Menteri Perintah Besai enggau Menteri Sarawak, Tuai Sekretari Menua Tan Sri Shamsul Azri Abu Bakar, Sekretrari Perintah Sarawak Datuk Amar Mohamad Abu Bakar Marzuki, Bala Sapit Menteri Perintah Besai enggau Sapit Menteri Sarawak sereta bala temuai dipebasa ke bukai. -EDISI UKAS
