PM Ngemendar Nangkir Padang Bilun Miri
Disiarkan pada 29 Sep 2024
Sumber Berita: UKAS
MIRI: Projek nangkir Padang Bilun Miri udah dikemendar ngambi tetangkupka tubuh temuai datai di wilayah nya.
Menteri Besai Dato’ Seri Anwar Ibrahim meri jamin deka ngerumban pejalai projek nya enggau deka ngatur randau lenak agi begulai enggau Menteri Pengangkut Anthony Loke sereta Opis Menteri Wang senentang pekara nya.
Ku iya, penyampau dagang temuai tumbuh taun tu nambah nyau deka 90 peratus dibanding taun siti nyin tadi.
“Laban bisi pengerembai baru.. nya alai endang patut (Padang Bilun Miri) ditangkir ke agi.
"Penanggul kitai iya nya penerebai bilun sereta mega perengka guna nyengkaum padang bilun,” ku iya madah.
“Malam tu, aku deka madah bekaul enggau Projek Nangkir Padang Bilun Miri udah diberi pemendar lalu aku deka pengawa nya diatur enggau lengkas agi,” ku iya madah maya bejaku ba Pengerami Makai Lemai ke diatur serimbai pejalai gawa iya ke Miri, Hari Enam.
Berebak enggau nya, Dato’ Seri Anwar nyemetak madah ke pengawa ngemendar sebarang projek ke diberi perati meseti ditimbal enggau pengawa dipejalai enggau lengkas.
Setimpak enggau pekara nya, iya madah ke Malaysia patut nyadi kompetitif agi, ulih beretan enggau dinamik dikena ngerebut peluang ari menua luar ke majak rindu ke Malaysia.
Sama bisi datai, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Yang di-Pertua Dewan Negara Dato Awang Bemee Awang Ali Basah, Speaker Dewan Undangan Negeri Sarawak Tan Sri Datuk Amar Mohamad Asfia Awang Nasar, Menteri Pemansang Indu, Ruang Bilik enggau Komuniti Dato Sri Nancy Shukri, Menteri Dalam Negeri Datuk Seri Saifuddin Nasution Ismail, Menteri Pengangkut Sarawak Dato Sri Lee Kim Shin, baris Menteri Besai enggau Menteri Sarawak, Tuai Sekretari Negara Tan Sri Shamsul Azri Abu Bakar, Sekretari Perintah Sarawak Datuk Amar Mohamad Abu Bakar Marzuki, baris Sapit Menteri Besai enggau Sapit Menteri Sarawak sereta temuai dipebasa ke bukai. -EDISI UKAS
