Pengelantang Sarawak Terus Negap Politik Malaysia
Disiarkan pada 28 Sep 2024
Sumber Berita: UKAS
MIRI: Pengelantang rayat pupu bansa sereta jalai pengarap di nengeri tu ulih negapka politik Malaysia.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, penyarut dalam politik ke bisi nyadi sebedau tu udah mujur diputar enggau efektif nengah kaul Sarawak.
“Ba gaya ti likun enggau lantang tu kitai bela beratika pemansang di selampur menua.
"Aku beratika dalam timpuh dua taun tu, kitai ulih negapka selampur menua Malaysia,” ku iya lebuh bejaku ba Pengerami Bejadi Program Madani Rakyat 2024 Sarawakku Sayang ditu, Hari Enam.
Datuk Patinggi Tan Sri (Dr) Abang Abdul Rahman Zohari mega madah, semina nengah penegap politik, pekara tu ulih meri empas ngagai ekonomi menua tumbuh ti positif sereta ulih matak pemeranak puku ari menua luar.
Nambah ke nya, pengawa tu mega udah ngayanka pengulih ekonomi di Malaysia majak manah betuai ke Menteri Besai Datuk Seri Anwar Ibrahim.
"Betuai ke Menteri Besai Dato’ Seri Anwar Ibrahim, tau dipeda dua tiga hari tu Ringgit Malaysia kitai majak manah. Tu kelai ekonomi kitai udah pulai baru,” ku iya nambah.
Pengerami ke udah dipenyadika Dato’ Seri Anwar bela ngemataka pengawa ngelanchar lumur rejista siri khas MADANI, pengawa nyuaka replika chek SejaTi MADANI sereta pengawa nyuaka perais chabut tikit benasip.
Berebak enggau nya, kededua tuai nya udah ngusung taba program nya seraya berandau enggau bala pemandang dia sereta bala temuai ke bisi datai.
Sama bisi datai, Sapit Menteri Besai Dato Sri Fadillah Yusof, Sapi Premier Sarawak Datuk Amar Profesor Dr Sim Kui Hian, Yang di-Pertua Dewan Negara Dato Awang Bemee Awang Ali Basah, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, bala Menteri Perintah Besai enggau Menteri Sarawak, Tuai Sekretari Menua Tan Sri Shamsul Azri Abu Bakar, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Perintah Besai enggau Sapit Menteri Sarawak, sereta bala pemesai ke bukai. -EDISI UKAS
