Singkang berani Perintah Sarawak betuaika Datuk Patinggi Tan Sri (Dr) Abang Abdul Rahman Zohari Tun Datuk Abang Openg nengkebang mayuh macham pun penatai tauka ekonomi baru diatu berupai mujur nyaguka nama Sarawak jauh pegari ari taun-taun ke udah.
Pemutus nyiri iya nganti penuduk Kepala Menteri ba taun 2017 suba bepun ari pemidang niang Pehin Sri Adenan Satem, siti pemutus ti ukai semina nandu enggau nampung pemeras niang Pehin Sri Adenan Satem ngemansang, nyaga sereta ngintu Sarawak tang pemerani enggau pengelandik Datuk Patinggi Abang Zohari udah ngubah jalai penatai pemisi Sarawak.
Ukai semina nya, Yang di-Pertua Negeri Sarawak sebedau tu niang Tun Pehin Sri Abdul Taib Mahmud suba kala madah, pemutus milih Datuk Patinggi Abang Zohari nyadi Kepala Menteri pemutus ke engkeman nampung pengawa ngemansangka Sarawak.
Ku iya, Datuk Patinggi Abang Zohari ngembuan mayuh penemu enggau peneleba ba politik nambahka iya endang ada ari ruang bilik tuai tauka pemesai ngatur Sarawak alai apai iya, Tun Datuk Abang Openg Abang Sapiee nyadi Gabenor Sarawak keterubah sepengudah penumbuh menua Malaysia.
Datuk Patinggi Abang Zohari bisi 'tim' ba Kabinet Sarawak ke chukup meras gawa lebih agi pengelandik ke dikembuan tiga iku sapit iya: Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Kui Hian ngemujurka semua pengawa ke digaga enggau dilanggur ulih mulai asil ti manah.
Sarawak Dulu Nyingkang Ari Menua Bukai
Tau dipadah jauh nyingkang dulu ari menua bukai, Sarawak teulihka runding numbuh agensi pemansang ba tuju ngerumban pemansang baikka infrastruktur tauka ekonomi di selampur nengeri tu.
Ketegal nya, Sarawak udah numbuhka Agensi Pemansang Sitak Betong (BDDA), Agensi Pemansang Ulu Rajang (URDA), Agensi Pemansang Tanah Tinggi (HDA), Agensi Pemansang Menua Utara (NRDA), Agensi Pemansang Greater Kuching (GKCDA), Agensi Pemansang Delta Rajang (RADDA), Agensi Pemansang Samarahan (IRSDA), Agensi Pemansang Sri Aaman (SADA) enggau Agensi Pemansang Rascom (RADA).
Tu endang nyengkaum chara ke bukai dikena meransang penegap enggau penumbuh ekonomi deka bejadika juluk ati nyadi menua pemadu mansang di Malaysia manggai taun 2030 baka Pelin Pemansang Udah COVID-19 (PCDS) 2030.
Perintah Sarawak bechuanka 12 pugu pelin pemansang mai Sarawak bejadika juluk ati nya ti mungkur Ngerumban Penumbuh Ekonomi, Nyungkak Pemansang Menua Pesisir, Meransang Pemeranak Puku, Pengawa Dagang enggau Dagang Mit enggau Jelan Pemesai, Ngubah Sarawak Nyadi Ekonomi Besemekih sereta Puh, Negap Modal Mensia enggau Pemansang Pengelandik, Nyungkak Transformasyen Digital, Ngemerat Pemeruan Rampa Menua, Nyungkak Pengelantang Mensia Mayuh enggau Pengelikun, Nyungkak Lumba, Main enggau Raban Nembiak, Ngemansang Ekonomi Bepelasarka Inovasyen enggau Penemu, Ngemunas Penyeranta enggau Nyungkak Pengelantang Rayat lalu kepenudi iya nya Nambah Pengulih enggau Pemanah Servis Kereja Perintah.
Enda semina nya, udah ke nyadi Premier Sarawak, pegai Datuk Patinggi Abang Zohari mansutka belanja ke chukup besai ketegal ngira pengelantang dudi hari rayat baka udah mujur ngambi Tekat Ai Bakun ari Perintah Besai ke beungkus RM2.5 bilion nyengkaum laluh jali sepenyampau RM5.6 bilion, projek ai enggau karan (RM5.1 bilion), infrastruktur komunikesyen (RM2.25 bilion), Sistem Pengangkut Kuching (KUTS) ti ngaga Autonomous Rapid Transit (ART) (RM6 bilion), Projek Jalai Tebing Tasik nyengkaum lapan iti jematan (RM11 bilion) kelimpah RM1.5 bilion diungkup ngagai tiap iti agensi pemansang ari RECODA.
Semua tu ngepunka pengerembai penatai ekonomi Sarawak alai empai lama tu tadi, Premier Sarawak diarika Sapit iya, Datuk Amar Douglas Uggah Embas maya Pengerami Nyambut Hari Malaysia di Sri Aman madah, siti kilang mantis minyak bio tauka bio-refinery deka digaga di Bintulu.
Pemadu baru, Sarawak diatu benung berati pengulih rumput bansa 'Napier' nyadi siti ari biojisim ti ngasilka kuasa ulih dikena baru.
Pansik udah dilanggur deka nanam rumput nya ba kebun mulung bedandang besai.
Penemu ngatur pengawa mansik tu bepun ari meda siti kompeni di Bintulu ke mujur ngasilka 2.5 tan pelet ari rumput ke dijual ngagai kompeni loji kuasa di United Kingdom.
Tu enda disengkaum enggau pengawa ke udah digaga tauka benung dilanggur ti bekenaka belanja ti chukup besai nyentuk manggai bilion ringgit baka ngaga kilang ammonia, metanol, grafit, solar kelimpah pengawa bekaul industri minyak enggau gas tauka kuasa hidro enggau kuasa ulih dikena baru ke bukai.
Penemu Sarawak 'Nyaris' Didinga Ba Renggat Global
Ari pemerani enggau pengelandik Sarawak diatu majak dikelala nyentuk Datuk Patinggi Abang Zohari udah suah dikangau datai bekunsika penemu iya bekaul ngatur sereta nengkebang pun penatai ekonomi baru ba menua bukai ke udah jauh mansang.
Iya kala dibasa ngenataika penemu ba Konferens Petroleum Asia Pasifik (APPEC) 2024 di Raffles City Convention Centre, Singapura, Forum Dagang Australia-ASEAN ke diatur di Sydney, Australia, Forum Teknologi Hidrogen Eropah Tengah enggau Forum Dekarbonisasi Eropah Tengah di Poznan, Poland kelimpah di menua mansang ke bukai.
Ba penemu menua bukai, Sarawak dipeda laju amat ngubah diri nempa pemansang.
Maya bisi forum antarabansa bekaul pemansang teknologi enggau ekonomi baru, Premier Sarawak suah nerima timbal ke manah ari bala pemesai baikka raban korporat tauka pengari perintah.
Sida tekait ati meda Sarawak udah jauh nyingkang ke mua lebih agi ba ekonomi baru.
Pia mega bisi nya datai ke Sarawak empu meda kediri pengawa ke digaga Sarawak nyengkaum ba teknologi kuasa gadung enggau pemeruan rampa menua.
Sarawak & Hidrogen
Pulai ngagai pelin ekonomi baru ke digaga Perintah Sarawak lebih agi bekaul hidrogen. Keterubah maya Datuk Patinggi Abang Zohari bejaku nyebut hidrogen beberapa taun ke udah, mayuh kakang ati besetujuka pelin ekonomi nya tau mulaika penguntung ngagai Sarawak.
Kebuah pia, bisi menua bukai ti lama udah ngereja pengawa ngasilka kuasa hidrogen ngemaduka diri ketegal enda pulaika penguntung.
Tu ngepunka mayuh penemu enggau peragam ti enda nyukung pemansang baru nya.
Tang penemu Datuk Patinggi Abang Zohari mai Sarawak ngalih ngagai teknologi hidrogen ukai ditengkebang pia aja enti ukai ari pansik ke silik diumba pengeraja asal ke dikembuan nengeri tu endang chukup ngemujurka pun penatai pemisi baru nya.
Nya kebuah, bisi menua bukai baka Jepun enggau Korea Selatan udah madahka diri deka meli kuasa hidrogen ari Sarawak ke disadang berengkah ulih eksport kuasa hidrogen ba taun 2027 ila.
Pemutus menua bukai meranakka puku di nengeri tu mandangka pengandal sida ngagai pengawa ke digaga Sarawak nengkebang ekonomi bepelasarka kuasa gadung seriris enggau pemeras global mutar isu klimet dunya.
Sarawak ketegal nya mega naka alah ngatur macham chara dikena ngerandang jalai numbuhka kerejasama enggau menua bukai ti meda pengulih Sarawak nyadi hub kuasa gadung di menua Asia meranakka puku ba nengeri tu.
Maya nemuai ngagai Seoul, Korea Selatan, Premier Sarawak empu betemu enggau pemeranak puku menua nya alai tiga iti kompeni besai Korea belabuh ngatur diri ngambi bagi ba projek H2biscus di Bintulu ti ngasilka gas hidrogen enggau ammnia digagaka nyadi kereban api beresi.
Siti ari kompeni nya enda kakang ati mantaika penemu diri bekaul ngaga projek bepelasarka kuasa gadung ti deka bekenaka ungkus manggai 460 bilion Dolar nyentuk taun 2050.
Ukai semina nya, Sarawak bela berandau enggau kompeni antarabansa ari menua Arab ke bisi ati bekerejasama enggau Sarawak ba industri gadung.
Kelimpah ari nya, ba tuju ke sebaka, menua Kesatuan Eropah (EU) kala nemuai ngagai Sarawak mega madahka diri bisi ati besaup enggau Sarawak ngereja industri nya.
AFFIN Bank & MASwings
Penegap ekonomi Sarawak majak dipeda berupai lebih agi diatu Affin Bank Berhad deka diempu Sarawak sepengudah Bank Menua Malaysia (BNM) ngemendarka penyampau majoriti Perintah Sarawak ba institusyen bank nya.
Pekara nya dipadahka Datuk Patinggi Abang Zohari empu maya pengerami ngintu penumbuh ke-100 taun Rumah Panjai Entrie Lengkoi, Ulu Paku di Betong, empai lama tu tadi.
Sebedau tu (Julai 2024), Sarawak kala madahka diri deka nambah penyampau saham ba Affin Bank ari 4.8 peratus ngagai urung 30 peratus.
Naka ke diatu, Lembaga Tabung Angkatan Tentera (LTAT) pemadu mayuh saham ba Affin Bank iya nya 28 peratus ditangkan Bank of East Asia Ltd, lebih 23 peratus enggau Boustead Holdings Bhd enggi LTAT bisi urung 20 peratus.
Pemutus tu dipeda deka nyaup Sarawak mujur agi meransang pengerembai enggau penumbuh ekonomi nyengkaum ngerandang awak ngagai pengawa dagang di Sarawak.
Ari sukut bukai, tu bela nyaup ngenegapka autonomi pekara wang nyerumba pengeransing Sarawak ngerembaika kuasa autonomi ti bekaul rat enggau ekonomi sereta pemansang menua.
Kelimpah ari nya, pengawa numbuh pemansang infrastruktur betikas besai dipeda ulih muntang agi dikereja Perintah Sarawak baka ba pekara bekaul belanja projek nya.
Enti dipeda enggau nyemetak agi, pemutus nya mega tau bendar ngasuh orang menua bukai enda kakang ati meranakka puku di Sarawak. Sida enda nangi nengeri tu enda tegagaka projek bekaul ekonomi ke besai ti bela mai penguntung ngagai sida mega.
Kelimpah Affin Bank, Sarawak sekali agi ngaga pemutus ti ngelui ari tikas runding menua bukai di Malaysia ke deka bisi kompeni penerebai bilun diri empu.
Batang kebuah Sarawak deka ngambi penerebai bilun MASwings endang ketegal bepun ari penyinu meda penanggul ke udah lama ditapi rayat Sarawak senentang bebelika tikit bilun maya pulai ke menua.
Datuk Patinggi Abang Zohari kala madah, ninting maya hari besai baka Gawai Dayak, Hari Raya, Krismas, Taun Baru tauka kemisi sekula, rayat suah sebana rega tikit bilun mar.
Nya alai, ku iya, enti udah ngambi MASwings, Sarawak ulih numbuhka kompeni penerebai bilun diri empu lalu tikit mega enda bangat nating belanja rayat.
Atur pengawa ngambi MASwings disadang ulih tembu ujung taun tu.
Ba pekara bukai, pemutus nya bela pulaika mayuh penguntung ngagai nengeri tu empu baka ba pekara bekaul pemansang ekonomi.
Udah tu ila, Perintah Sarawak nyangka deka ngaga penerebai bilun datai di menua pesisir ti disadang ngerandang chara baru ngemuntangka pengawa bejual asil betanam betupi.
Lalu tu dipeda tau bendar meransang rayat di menua pesisir ngepunka pengawa betanam betupi di menua ke endang ditemu agi mayuh tanah temuda.
Ba industri dagang temuai, udah tentu penerebai bilun tu ila tau nyaup nyungkak industri nya matak mayuh agi temuai datai ngagai nengeri tu lebih agi ngagai menua ke jarang ditapat tang ngembuan pemanah rampa menua tauka kampung ti empai ditujah pemansang.
Nya alai, pemutus Perintah Sarawak ngambi kompeni MASwings enda ulih ditingkah ketegal ngira pengelantang enggau penyenang rayat dudi hari ila.
Simpul Penemu
Diatu pemerani Sarawak udah belabuh ngayanka dengah.
Nyema semua program enggau projek Perintah Sarawak nyadi magang, rayat Sarawak dulu agi deka ngasaika pemansang. Baik nya ba pengidup tauka pemansang menua.
Sarawak kala nerima gela menua bepenatai pemisi besai ba taun 2023 ari Bank Dunya lalu mengkang megai gela nya taun tu enggau Penatai Menua Kasar (GNI) manggai USD17,000 enti dibanding USD15,000 taun sebedau tu.
Menteri Pemeranak Puku, Dagang enggau Industri (MITI), Tengku Datuk Seri Zafrul Tengku Abdul Aziz mega kala madah, Sarawak nyadi menua ti mayuh nyaup pengerembai ekonomi Malaysia ba suku keterubah 2024, mujur matak RM4.2 bilion penyampau pemeranak puku.
Inisiatif ke digaga Sarawak baka kuasa hidrogen gadung dipeda bisi penau matak pemeranak puku, seriris enggau langgur timpuh panjai Malaysia ba Pelin Kuing Tuju Kuasa Ngalih Menua (NETR) enggau Pelin Besai Industri Baru 2030 (NIMP 2030).
Jalai ke udah tauka benung ditujah, ditebas Sarawak diatu dipeda majak tawas ngelawa juluk ati nyadi nengeri mansang ba taun 2030.
Tusun enggau langgur penemu digaga enggau naka pemanah, mai Sarawak jauh pegari ari bepuluh taun ke udah-udah.
Badu agi dipeda semina ayas, rapas-rapas tang nyengala tau pulai ke penguntung, pengidup ke badas.
Tang tu ukai reti rayat semina tau duduk nukung, nganti jari datai nulung ngatung. Belabuh muka runding nyambut pemansang datai.
