KOTA SAMARAHAN: Perintah Sarawak minta Perintah Besai mulaika baru kuasa nyiri Kaban Komiti Direktor (AJP) Gerempung Orang Bekebun Nengeri (PPN) enggau Gerempung Orang Bekebun Menua (PPK) nitihka Sempekat Malaysia 1963 (MA63).

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kuasa nyiri ke dikembuan Perintah Sarawak nya deka ngerumban agi pemansang sektor betanam betupi di Sarawak.

Ku iya, Menteri Industri Pemakai, Komoditi enggau Pemansang Kandang Menua (MFICORD) Sarawak, Dato Sri Dr Stephen Rundi deka berandau enggau Luyar Besai Sarawak Datu Saferi Ali berati silik agi peminta nya sebedau dikenatai ngagai Perintah Besai.

"Enti ikan (gerempung orang berikan nengeri) udah bisi kuasa, beri mega kuasa ngagai Gerempung Orang Bekebun (Nengeri enggau Menua)," pia ku iya maya Pengerami Bejadi Begunan Gerempung Orang Bekebun Nengeri Sarawak (PPPNS) ditu, Hari Tiga.

Sebedau tu, menteri ke megai pengawa betanam betupi di Sarawak diberi kuasa nyiri AJP ungkup PPN enggau PPK.

Taja pia, kuasa nya dibatak pulai ba taun 2018 suba lalu diberi ngagai Menteri Betanam Betupi Malaysia, taja pengawa betanam betupi ari baruh Rintai Nengeri ba Konstitusyen Perintah Besai.

Nangkan nya maya berandau enggau media Datuk Patinggi Abang Zohari madah, Perintah Sarawak mega deka ngaga siti agi gudang baru ba tuju nyukung pengawa eksport asil pemakai ngagai menua bukai.

Ku iya, pengawa nya deka bekenaka belanja RM17 juta bela disempulang enggau perengka guna moden nyengkaum begunan baru PPNS.