KOTA SAMARAHAN: Bilun kargo deka nyadi chara baru dikena ngemuntangka pengawa nganjung asil betanam betupi ari Sarawak ngagai Singapura.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, chara nya deka ngemuntangka agi pengawa nganjung lalu ngerandang mayuh agi awak betanam betupi Sarawak nyual asil ngagai makit antarabansa.

Berindik ari nya, iya minta Gerempung Orang Bekebun Nengeri Sarawak (PPNS) ngira ungkus nyuwa bilun kargo dikena ngatur belanja.

"Enda ibuh meli bilun kargo, kitai nyuwa aja ngambika belanja enda kelalu besai, baka chara kitai nyuwa luri.

"Kitai nguji dulu ba timpuh suku keterubah. Enti dagang manah, kitai deka nambahka penyuah nyuwa bilun.

"Kira dulu, ambika banding berapa pemayuh ikan tauka buah ke ulih dianjung, berapa suwa dua kali pejalai dalam sehari...pasukka ba rintai bajet laban aku deka terus meri belanja RM10 juta setaun," ku iya madah.

Iya bejaku munyi nya maya Pengerami Bejadi Begunan Baru PPNS & Aum Besai Ninting Taun PPNS Ke-39 di Begunan PPNS ditu, Hari Tiga.

Maya nya mega Datuk Patinggi Abang Zohari madah, begunan baru PPNS beungkus RM20 juta nya disikap enggau perengka guna pemadu baru ngambika pengawa nyual enggau meli asil betanam betupi muntang agi.

"Kitai deka ngaga 'imej' baru pengawa betanam betupi. Nya alai aku ngemendar agih belanja dikena ngaga begunan tu," ku iya nerang.

Ba pengerami nya, Datuk Patinggi Abang Zohari bela ngemata pengawa nyuaka Pemeri Turu Wang Pelajar beserimbai MAT PPN 2024.

Bela bisi datai, Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom enggau Sapit Menteri iya ke mega Chairman PPNS Datuk Dr. Abdul Rahman Ismail, Sapit Menteri Pemansang Genturung Pendiau enggau Kandang Menua Datuk Rubiah Wang, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Sapit Menteri Industri Pemakai, Komoditi enggau Pemansang Kandang Menua Sarawak Datuk Martin Ben, Kaban Kunsil Nengeri (ADUN) Muara Tuang Dato’ Idris Buang sereta pemesai ke bukai.-Edisi UKAS