KUCHING: Graduate ari palan pengelandik enggi Perintah Sarawak baka Sarawak Skills enggau Kolej Universiti i-CATS diaku nipak guna industri, nyaup pemansang ekonomi enggau teknologi negeri tu.

Premier Sarawak Datuk Patinggi Tan Sri (Dr.) Abang Abdul Rahman Zohari Tun Datuk Abang Openg madah, Perintah Sarawak chakah ngemansangka nembiak ngambika bela ngemujurka tuju penumbuh Pelin Pemansang Udah COVID-19 (PCDS) 2030.

Ku iya, tu bela diperatika ba industri 'aerospace', ekonomi digital kelimpah pengawa napi ubah klimet.

"Diatu Sarawak Skills nengah Kolej Universiti i-CATS udah numbuhka fakulti 'aerospace'.

"Kolej Universiti i-CATS deka lebih agi ngemeratka subjek baka astronomi, fizik, kimia enggau algoritm ti nyadi sebagi ari bidang sains, teknologi, engineering enggau matematik (STEM)," ku iya madah.

Iya bejaku munyi nya nengah teks ke dibacha Menteri Pelajar, Inovasyen enggau Pemansang Pengelandik Sarawak Dato Sri Roland Sagah Wee Inn maya Pengerami Konvokesyen Ke-26 Sarawak Skills & Kolej Universiti i-CATS di Palan Konvensyen Borneo Kuching (BCCK) ditu, Hari Tiga.


Iya ke mega Canselor Kolej Universiti i-CATS madah, fakulti nya bisi subjek bekaul teknologi 'aerospace' nyengkaum ngaga komponen enggau kereban bilun.

Ba Konvokesyen ke-26 serak tu, 982 gradute nyengkaum 663 ari Sarawak Skills enggau 319 ari Kolej Universiti i-CATS dirami.

Bela bisi datai maya nya Sapit Menteri Pelajar, Inovasyen enggau Pemansang Pengelandik Sarawak Datuk Dr. Annuar Rapaee, Chairman Sarawak Skills Tan Sri Datuk Amar Dr. Abdul Aziz Dato Husain, Direktor Eksekutif Sarawak Skills & Kolej Universiti i-CATS Hallman Sabri sereta bala bukai. -EDISI UKAS