BINTULU: Ulah ngemeranka pemeresi patut diterenak ba nembiak mit nengah pelajar tumu sida.
Menteri Pemansang Raban Indu, Nembiak Mit Enggau Pengelantang Mensia Mayuh Dato Sri Fatimah Abdullah madah, ulah ‘osoji’ ari menua Jepun ngiri nembiak ngemeranka ulah nyaga pemeresi ari umur biak.
Ku iya, ulah nya mega mai nembiak semampai ngemeranka pemeresi ba pengidup seraya mai sida bela bebasaka rampa menua, mensia enggau endur diau.
Iya bejaku munyi nya ba Pertama Ferroalloys (PFA) Female Forum 3.0 di Bintulu, Hari Tiga tu tadi.
Dato Sri Fatimah mega nyemetak madah, ajar ‘osoji’ nya dikena ngelatih raban nembiak mit nyadi orang besai tuai ti mereti maya bebuai ka sampah sida.
“Pekara tu endang amat patut dikemeranka nembiak mit ba aspek pemeresi sida ari luar enggau dalam kelas seraya ba pengidup sida,” ku iya.
Program maya nya digulu 100 iku penyereta ari Pengereja Pengawa Indu Ferroalloys Pertama nyengkaum Gerempung Raban Indu Ke Bukai.
Sama bela datai, Sapit Menteri Pemansang Raban Indu, Nembiak mit enggau Pengelantang Mensia Mayuh (KPWK) Datuk Rosey Yunus, Sekretari Mendam KPWK Datu Felicia Tan, Chairperson Opis Raban Indu enggau Ruang Bilik Sarawak Salmah Jobeli, Chairman ke mega Minijer Pertama Ferroalloys Sdn Bhd Yuki Nakamura enggau Minijer SEDIDIK Sdn Bhd Ayub Dahari. -EDISI UKAS
