SARIKEI: Kerejasama bala pemesai enggau rayat beguna bendar dikena ngemuntangka langgur pemansang digaga di menua tu.
Sapit Menteri Pengatur Mengeri, Tanah enggau Rampa Menua Sarawak Datuk Len Talif Salleh madah, bala pemesai patut ngembuan kaul ke manah enggau rayat enda ngira sida pengari rayat tauka tuai raban bansa enggau tuai genturung pendiau (KMKK).
“Nama ke ulih dipeda kitai iya nya kerejasama enggau penyerakup ke nyadi ba mensia mayuh maya ngatur pengerami ti ngelai pemanah kaul antara rayat enggau bala pemesai.
“Penyerakup ke manah tu patut ditanka kitai enda ngira bansa,” ku iya madah.
Iya nerangka pekara nya maya Pengerami Riang Ria Aidilfitri Begulai Enggau Pemesai ditu, Hari Dua tu tadi.
Kaban Parlimen Tanjong Manis Ir Yusuf Abdul Wahab ti bela ngulu pengerami maya nya besepenemu enggau Datuk Len alai iya ngarapka penyerakup enggau pengelantang pengidup majak disungkak seraya nyambut hari besai.
Pengerami ba Kampung Sarikei nya nyadi palan kepenudi Pengerami Riang Ria Aidilfitri ke udah berengkah ari 13 April tu tadi.
Pengerami nya bela digulu 800 iku peranak menua di Kampung Sarikei.
Sama bela datai ngerichahka agi pengerami nya, bala Tuai Opis Perintah, KMKK sereta peranak Kampung Sarikei. -EDISI UKAS
