Pengerami Ai Sibujaya 2024 Matak Lebih 20,000 Pengusung
Disiarkan pada 22 Sep 2024
Sumber Berita: UKAS
SIBU: Lebih 20,000 pengusung ngerichah Pengerami Ai Sibujaya 2024 ti udah dipenyadi Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah.
Dato Sri Abdul Karim madah, pengerami nya aja pengerami ai di Sarawak ti disema baka 'Songkran Water Festival'di Thailand ti chukup manah lalu meri pemaik ngagai peranak menua.
“Aku nemu bisi ke datai ari menua Bintulu sereta ke bukai, begulai ba pengerami tu sereta meri pemaik ke besai amai, laban sida ke datai mayuh ari nembiak mit, apai indai nyentuk ke aki ini pun sama bela ngerichah pengerami tu.
“Nya reti nya, lebuh pemisi sekula tauka ujung minggu baka tu ulih meri ruang ngagai sida sebilik, family bonding,” ku iya madah.
Iya madah munyi nya maya dirandau media sepengudah bejadika Pengerami Ai Sibujaya 2024, kena Hari Enam tu tadi.
Ku iya nambah, pengerami baka tu ulih ngerapitka agi kaul ruang bilik ke alai bala apai enggau indai ulih mai anak sida iya datai berami.
Kelimpah ari nya, bala pedagang lokal mega deka bulih pemaik.
Ku iya madah baru, tu kali ketiga iya datai ba Pengerami Ai Sibujaya lalu pengerami sekali tu naka pemadu manah.
Nangkan nya, iya meri pengaga ati ngagai raban Amcorp enggau Kaunsil Pelilih Menua Pesisir (MDLBS) , laban opis menteri sida iya seruran nyukung program baka tu lalu, bearap pengatur pengawa tu ulih nyadi program ninting taun di Sibujaya.-EDISI UKAS
