KUCHING: Sarawak dipeda ngembuan pengelebih nyadi bakih ba industri dagang di Turki.
Duta Besai Republik Turki Ke Malaysia Emir Salim Yuksel madah, iya tekait ati meda pengerembai pemansang ke nyadi di nengeri tu.
"Nya alai sehari tu aku diberi basa betemu enggau Yang di-Pertua Negeri Sarawak, Tun Pehin Sri Dr Wan Junaidi alai kami berandauka mayuh macham pekara.
"Sehari tu enggau pagila aku mega deka nemuai ngagai Universiti Malaysia Sarawak (UNIMAS) kelimpah begulai enggau beberapa bengkah organisasyen dagang di Sarawak.
"Nama ke deka digaga aku iya nya kami nguji nempa kaul enggau orang dagang di nengeri tu," ku iya madah.
Iya nerangka pekara nya ngagai media udah ngatur penemuai basa ngagai Tun Pehin Sri Dr Wan Junaidi Tuanku Jaafar di Astana Negeri Sarawak ditu, Hari Empat.
Nambahka jaku iya, Emir madah, penemuai basa nya diatur dikena berandauka pekara bekaul dagang, ekonomi sereta kaul antara raban dagang Turki enggau Sarawak.
Ba penemu iya, semua menua diatu benung ngiga awak numbuhka dagang ba dini-dini endur lebih agi udah pandemik COVID-19 nyadi. -EDISI UKAS
