Ngintu Pengerami Hari Pengada Ke-78 Yang Di-Pertua Negeri Sarawak Kena 10 Ngagai 13 Oktober Ila
Disiarkan pada 21 Sep 2024
Sumber Berita: UKAS
KUCHING: Sarawak deka ngatur pengerami enggau chukup richah dikena ngerami hari pengada Yang Dipertua Negeri Sarawak, Tun Pehin Sri Dr. Wan Junaidi Tuanku Jaafar Ke-78, Di Kuching ditu, berengkah ari 10 ngagai 13 Oktober ila.
Menteri Dagang Temuai, Industri Kreatif enggau Seni Pemerindang Sarawak ke nyadi Menteri Ngempu Tanggungpengawa, Dato Sri Abdul Karim Rahman Hamzah madah, pengerami sekali tu chukup besai reti laban pengerami keterubah meri basa ngagai Tuan Yang Terutama (TYT) ke baru.
Ku iya, bisi tujuh batang program ngaul bemacham aktiviti udah diripih Unit Protokol, Istiadat enggau Pengatur Achara (UPPAN) Sarawak ke nyadi tuai pengatur.
“Pengerami kena 10 Okotber ila deka dipun enggau Pengerami Selamat ke diatur ba Masjid Jamek, urung pukul 6.00 lemai.
“Lalu, kena 11 Oktober, Khutbah Khas deka diatur sebedau sembiang Jumaat ba semua masjid selampur Sarawak ke diatur Opis Pengarap Islam Sarawak (JAIS).
“Nangkan nya, muak ke lemai, pengerami diteruska enggau Pengerami Ngintu Selamat nuju Pengarap Bukai ke diatur Unit Pekara Pengarap Bukai (UNIFOR) di Hotel Riverside Majestic Kuching enggau tagit 350 temuai datai,” ku iya madah.
Iya nerangka pekara nya ba aum media pengudah ngetuai ke Aum Komiti Pengatur Ngintu Pengerami nya, di Kuching ditu, kena Hari Lima tu tadi.
Ngenang silik agi, Dato Sri Abdul Karim madah ke batang pengerami iya nya Istiadat Perbarisan enggau Rapat Raksasa kena 12 Oktober, diatur tumu pukul 8.00 pagi di Padang Merdeka Kuching, dientudika Istiadat Meri Darjah-Darjah Kebesaran Negeri Sarawak pukul 11.30 Pagi di Astana Negeri Sarawak.
“Istiadat ke diatur UPPAN Sarawak enggau kerejasama Opis Residen Sitak Kuching enggau Astana Negeri Sarawak deka digulu 78 kontinjen pengawa baris, seraya dirichah enggau bemacham pemerindang ari Kaunsil Seni Sarawak (MSS).
“Ba hari ke sama, Pengerami Jamuan Negeri nya deka diatur ba Dewan Santapan, Kaban Kunsil (DUN) Sarawak urung pukul 8.00 malam enggau isi program nyengkaum nyirap kek hari pengada ke-78 TYT Yang di-Pertua Negeri Sarawak enggau pemerindang panggau ti ngerinduka ati,” ku iya nerang
Berebak enggau nya, Pengerami Ngirup Teh diatur UPPAN Sarawak begulai enggau Opis Pengintu Pengelantang Komuniti Sarawak mega ku iya, ngujungka sekali tu, belabuh pukul 10.00 pagi di Hotel Riverside Majestic Kuching.
"Tun Pehin Sri Dr Wan Junaidi sereta bini, Toh Puan Fauziah Mohd Sanudi deka nyadung pemeri ngagai bala anak yatim, asnaf enggau sida ti beguna.
"Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta bini, Puan Sri Datuk Amar Juma'ani Tun Tuanku Bujang disadang datai sereta bala temuai dipebasa ke bukai.
"Aram kitai besampi ngambika semua program tu ulih bejalai enggau lanchar, gaya hari ke manah ngagai TYT,” ku iya nambah baru.
Ungkup penerang, semua pengawa nya deka dipanchar terus di TVS saluran 122 sereta Facebook enggau Youtube Unit Komunikasi Awam Sarawak (UKAS).
Sama datai ba aum media nya Sapit Menteri di Opis Premier Sarawak (Undang-Undang enggau Adat Bumiputera) Datuk Jefferson Jamit Unyat enggau Sapit Menteri Sarawak (Sungai enggau Tasik) Dato Henry Harry Jinep ke ngari ke Menteri Ngempu Tanggungpengawa, Direktot UPPAN Sarawak Hamdan Sharbini sereta sekeda pemesai dipebasa ke bukai.-EDISI UKAS
