Atlit Boccia & Tenpin Boling Sabah Udah Nyikap Diri Ungkup Para SUKMA XXI 2024
Disiarkan pada 20 Sep 2024
Sumber Berita: UKAS
KUCHING: Bala atlit Sabah enggau Wilayah Persekutuan Kuala Lumpur udah sedia nurun bepekit ba Para SUKMA XXI 2024 mai juluk besai mai nama nengeri sida pegari.
Pemberita Unit Komunikasi Awam Sarawak (UKAS) ke sama datai ngambat penatai kontinjen atlit Para SUKMA di Padang Bilun Antarabansa Kuching (LTAK), Hari Lima, ngena peluang nya ngerandau sekeda atlit, bekaul pengawa nyikap diri sereta pengarap sida ba lumba ke sekali tu.
Atlit baru ari Wilayah Persekutuan Kuala Lumpur, Muhd Asyraaf, atlit baru terubah bepekit ba pekit Boccia, ngarapka diri ulih mai pulai midul sepengudah iya meda lumba ba Paralimpik Tokyo tu tadi.
"Aku ngarapka ulih berengkah enggau midul engkeraju. Enti emas, nya dikira bonus besai. Main tu engkeman enggau bakat aku, lalu aku andal amat ulih nempa pemujur," ku iya.
Ari nengeri baruh remang, atlit ping pong kategori TT9, Brady Chin, mai ati ransing deka ngetanka penyulut ba edisyen lumba sebedau tu.
"Aku deka ‘all out’ sekali tu lalu ngarapka ulih ngetanka momentum enggau prestasyen baka dua taun ke udah. Aku nurun bepekit enggau ati ransing," ku Brady.
Atlit tenpin boling kategori TPB1 ari Sabah, Azuan Amir Hassan mega udah mantaika pengarap besai enggau juluk ngulihka tiga midul emas.
Ku iya, atlit ti ulih mekit iya datai ari nengeri baka Johor, Pulau Pinang enggau Pahang, tang iya andal amat teulihka pemujur sekali tu.
“Enti nitih, semua nengeri sigi enggau kami belaban, baka nengeri ke pemadu semak iya nya, Johor, Pulai Pinang enggau Pahang.
“Juluk taun tu deka ngulih tiga midul emas ungkup semua kategori tenpin boling,” ku iya. -EDISI UKAS
