Wilayah Persekutuan Kuala Lumpur Nyabung 70 Peratus Atlit Baru, Juluk 40 Midul Emas Ba Para SUKMA
Disiarkan pada 20 Sep 2024
Sumber Berita: UKAS
KUCHING: Wilayah Persekutuan Kuala Lumpur nyabung 70 peratus atlit baru ba pekit Para SUKMA XXI 2024 di Sarawak.
Kontinjen ti betuai ke Sabran Abd Bahar nya dipeda mai juluk besai ngerebut podium, enggau juluk bulih 40 midul , iya nya 10 midul emas, 15 midul pirak enggau 15 midul engkeraju.
Sabran madah, program ngiga bakat Inspire i-Talent ke diatur Opis Nembiak enggau Lumba Kuala Lumpur, udah mujur mai atlit baru ngagai tim Wilayah Persekutuan Kuala Lumpur enggau nyidi bakat besai ari indu mengeri.
“Program I-Talent tu udah mantu kami ngelala bakat baru, lalu dibai ke Sarawak.
“Atlit kami bisi 61 iku, lalu 70 peratus ari sida iya atlit baru,” ku iya.
Iya madah munyi nya maya dirandau Unit Komunikasi Awam Sarawak (UKAS) pengudah datai begulai enggau bala atlit sida di Padang Bilun Antarabansa Kuching (LTAK), Hari Lima.
Enggau pengarap besai ngagai bakat atlit sida, Sabran nyemetak madahka tiga pekit iya nya nyemerai, olahraga, enggau lawn bowl dikearapka ulih nyadi lubuk emas ngagai Wilayah Persekutuan Kuala Lumpur.
"Nitih ari aum kami enggau jurulatih sereta serakup lumba tu, bisi tiga lumba ke ulih dikearapka kami iya nya main nyemerai, olahraga enggau lawn bowl," ku iya nambah. - EDISI UKAS.
