KUCHING: Keterubah iya Gawai Bazaar beserimbai Gawai Dayak Renggat Nengeri Sarawak Taun 2024 deka diatur ba Laman Dagang Mjc Batu Kawa, di Kuching kena 16 ngagai 26 Mei tu ila.
Kaban Kunsil Nengeri (ADUN) Serembu ke mega Sapit Chairman Komiti Pengatur Gawai Bazaar 2024, Miro Simuh madah, bazar nya ila deka bisi 180 iti kedai bejualka macham bansa pemakai, ai irup enggau kraft jari.
Kelimpah ari nya ku iya, pengerami 11 hari berunggu nya bela disempulang enggau macham program bukai.
"Mayuh macham program deka diatur ila berengkah ari pukul 2 lemai nyentuk 12 tengah malam.
“Pengerami nya ila mega deka dirichah enggau macham bengkah pemerindang nyengkaum beperindang enggau artis menua tu empu.
“Nya alai, ku nesau mensia mayuh lebih agi bansa Dayak bela sampal datai ngerichah Gawai Bazar 2024 nya,” ku iya.
Iya madahka pekara nya maya dirandau Unit Komunikasi Awam Sarawak (UKAS) udah betuaika aum Komiti Pengatur Gawai Bazaar Pengerami Gawai Dayak Renggat Negeri Sarawak di Kuching, Hari Tiga tu tadi.
Iya mega madahka program ke empat kali udah diatur nya deka dipenyadika Sapit Premier Sarawak ke mega Chairman Komiti Pengatur Pengerami Gawai Bazaar 2024, Datuk Amar Douglas Uggah Embas kena 17 Mei 2024.
