MARUDI: Balai Orang Dagang Bumiputera Sarawak (DUBS) Pampang Marudi deka nyaup nyungkakka agi pengawa ekonomi rayat di sitak Marudi.
Presiden DUBS Datu Abang Helmi Ikhwan madah, pengawa betanam betupi baka nanam sawit, getah, lada enggau ke bukai bela dikemerat kelimpah pengawa bekaul dagang.
“Ba pekara tu, Perintah Sarawak udah meri bantu nengah DUBS dikena nyaup nyungkakka pengawa betanam betupi di Marudi," ku iya.
Iya nerangka pekara nya maya ba Pengerami Ramah Tamah Aidilfitri 2024 DUBS Pampang Marudi ditu, Hari Tiga tu tadi.
Nambahka jaku iya, Datu Abang Helmi madah, DUBS deka meransang raban nembiak bela ngambi bagi ba pengawa dagang ba tuju nyungkak ekonomi.
Ba pengerami nya, DUBS Pampang Marudi bisi nyuaka pemeri ngagai 10 penerima indai tunggal enggau Orang Timpang Pendiau (OKU).
Sama bela datai, Chariman DUBS Pampang Marudi Mujan Lah, Pemangku Pegawai Pelilih Marudi Rose Edward Tarang enggau Sapit Presiden DUBS Roselyn Long Lah. -EDISI UKAS
