KUCHING: Sarawak deka enggau baru ngambi bagi ba program pemandang dagang IMEX Frankfurt ke diatur belabuh ari 14 ngagai 16 Mei tu ila di Frankfurt, Jerman.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, Sarawak Pavillion maya nya ila deka berambaika jaku 'Program Dagang Nyukung Pemansang Komuniti'.
Ku iya tu ngelai ngemeranka industri besai pengawa ba ubah rama enggau ekonomi nengah program dagang.
“IMEX Frankfurt siti program pemandang dagang ke chukup manah dikena ngelakuka Sarawak nyadi palan program dagang lalu ngambika nengeri kitai lebih agi dikelala dunya.
"Program nya engkeman lebih agi ungkup pengatur program dagang ti ngemeratka pengawa mutarka isu rama menua, rama enggau atur.
"Pelin Pemansang Udah COVID-19 (PCDS) 2030 ulih nyaup ngemujurka tuju mutarka isu rampa menua lalu pelin tu nyadi chara ke beguna bendar," ku iya madah.
Iya madahka pekara nya ba aum media ditu, Hari Tiga.
Ba pekara bukai, Dato Sri Abdul Karim minta padang bilun di Sarawak dikemanahka agi lebih agi padang bilun ke nerima penatai orang ari menua bukai.
Kelimpah ari nya, iya mega ngarapka perengka guna ba palan temuai baka Taman Negara Bako enggau Palan Mulaika Pemanah Jelu Siga Semenggoh bela ulih diadu manah bepun ari Sarawak deka nerima gela Taba Pesaka Asal Rampa Menua UNESCO bulan Julai tu ila.
Sama bela datai ba aum media nya, Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan. -EDISI UKAS
