Para SUKMA 2024: Sarawak Nentu Pengangkut & Logistik Atlit Dijaga Manah
Disiarkan pada 18 Sep 2024
Sumber Berita: UKAS
KUCHING: Komiti Besai Para Lumba Malaysia (SUKMA) XXI Sarawak 2024 deka nentuka semua pengangkut enggau logistik diguna bala atlit diatur enggau manah.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, semua entukar nyengkaum bas Rapid KL deka bejalaika pengawa beranjung ari endur diau ngagai venue pekit, pengawa rasmi, pengawa nutup enggau endur ke bukai ke relevan.
“Sehari tu kitai deka meda penatai bas ke deka dikena ungkup pengangkut maya Para SUKMA XXI Sarawak 2024.
“Tu siti inisiatif ke diambi Perintah Nengeri Sarawak enggau kerejasama Rapid Bus dikena nentuka perengka bala atlit, pegawai enggau temuai enggau manah.
Iya nyebut jaku nya ba Aum Media ‘Dry Run’ Rapid KL Serimbai Para SUKMA Sarawak 2024 ditu, Hari Dua.
Dato Sri Fatimah ke mega Chairman Komiti Besai Para SUKMA Ke-21 madah baru, Perintah Sarawak udah ngagihka RM845,000 ungkup kos pulai mansang Rapid KL ke nyadi Bakih Rasmi Pengangkut ari Penyangkai Kapal Klang enggau Penyangkai Kapal Kuching.
Kelimpah ari nya ku iya, bisi 44 iku pegawai enggau staf ari Rapid KL udah datai tumu kena 13 September tu tadi ngambika nelebaka diri enggau jalai ke venue pekit ila.
“Bas udah disedia enggau perengka OKU, nyengkaum ‘ramp’ enggau ruang khas ungkup kerusi roda.
“Tu seriris enggau pengeransing kitai nyediaka pengangkut ti inklusif sereta likun ngagai semua atlit, lebih agi, sida ke deka bepekit ba Para SUKMA,” ku iya nerang.
Ke penemu mayuh, kelimpah ari 25 buah Rapid KL, bisi 37 buah bas, 79 buah van, 19 buah SUV, 20 buah kerita enggau 10 buah lori deka dikena sekumbang pekit Para SUKMA 2024 ila.
Sama datai Sapit Menteri Pemansang Pengelantang Komuniti Sarawak ke nyadi Chef de Mission (CDM) Kontinjen Para Sarawak Datuk Mohammad Razi Sitam, Sapit Menteri Pemansang Indu enggau Nembiak Mit Sarawak Datuk Rosey Yunus, Sekretari Mendam Opis Menteri Pemansang Indu, Nembiak Mit enggau Pengelantang Komuniti Datu Felicia Tan Ya Hua enggau Tuai Pegawai Eksekutif Rapid Bus Sdn Bhd Muhammad Yasutin Sallij. -EDISI UKAS
