Friday Belik Ngulu Pengerami Makai Lemai Kue Bulan
Disiarkan pada 17 Sep 2024
Sumber Berita: UKAS
SARATOK: Kaban Kunsil Nengeri (ADUN) Krian, Friday Belik udah ngulu Pengerami Makai Lemai Kue Bulan ke diatur ba Balai Sedandang SJK(C) Min Syn, Saratok ditu, kena Hari Minggu.
Pengerami ke diatur Alumni Nembiak SJK (C) Min Syn udah digulu urung 800 iku datai ari pupu bansa.
Lebuh bejaku ba mua mayuh, Friday madah ke Pengerami Kue Bulan ke diintu komuniti Tiong Hua nyadi pengawa ke beguna diintu ninting taun ari bulan Ogos ngagai September lebuh bulan kembung.
“Pengerami tu kelai pengarap ngambi pengidup deka mansang baka bulan kembung,” ku iya.
Iya mega ngemeratka penyerakup ti tegap ba raban komuniti enda ngira pengarap, bansa sereta penatai kunchi ngagai pengelantang begulai.
“Bulan ti mansang nya mega ulih ngerapitka agi penyerakup ngagai kitai semua,” ku iya nambah.
Kelimpah nya, Friday mega madah penyerakup enggau ulah bebatak ansur ti manah deka nentuka ekonomi nengeri Sarawak majak mansang sereta maju.
Ku iya, ari penyerakup ti tegap mega, semua pemansang ulih dipejalai enggau ngasi sereta komprehensif agi.
Pengerami tu mega mandangka semangat ti lantang sereta penyerakup ngagai raban komuniti.
Sama datai ba pengerami nya, ADUN Kalaka Mohammad Duri, Pemancha Lim Guan Ann, Pemancha Thomas Lamit sereta temuai ke bukai.-EDISI UKAS
