1,000 Kue Bulan Disadung Ba DUN Pelawan
Disiarkan pada 17 Sep 2024
Sumber Berita: UKAS
SIBU: Bisi 1,000 Kue Bulan halal udah disadung ngagai rayat ari pupu bansa ba sitak Kunsil Nengeri (DUN) Pelawan.
Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Michael Tiang Ming Tee madah, inisiatif nya siti ari pengawa iya mai semua pupu bansa ngulu pengerami nya.
Ku iya nerang, semua pengerami di Sarawak patut diintu begulai enda ngira pupu bansa, jalai pengarap sereta asal penatai dikena nerenak semangat penyerakup.
“Kue Bulan nya sigi halal, ngambika kitai ulih meransang bala kaban kitai ke megai pengarap Islam ulih nyepi. Tu mih semangat Sarawak. Tiap Kali pengerami, semua pupu bansa bela ngerami ke iya.
"Genap rayat Sarawak ulih ngintu pengerami Gawai, baka bansa China mega ngintu pengerami Gawai, sereta Hari Raya."
"Nyadi aku ngasaika tu semengat ti chukup engkeman, kena kitai ngangkatka penyerakup," ku iya.
Iya madah munyi nya maya dirandau media maya ngulu Ngintu Pengerami Kue Bulan di Taman Trafik Rejang Park, Sibu, kena Hari Enam tu tadi.
Ku iya, raban sida berasai gaga enggau timbal manah ari mensia mayuh ke alai penyampau pengusung ke datai ngelui ari juluk iya.
Ku Datuk Michael Tiang, tukuh segala nya sama baka penyerakup pupu bansa di Sarawak, ke alai pekara tu ulih dijapai nyema kitai beserakup.
“Bulan Sarawak ulih nyadi segala nyema kitai beserakup, taja penatai kitai bebida, pengarap kitai bebida sereta bansa kitai bebida mega, tang nya ukai penekul ngagai kitai deka beserakup baka bulan kembung, ke chukup manah.
“Nyadi, pengerami tu mai reti ke chukup besai ngagai kitai,” ku iya madah baru.
Nangkan nya, bemacham pemerindang enggau program ti ngerinduka ati bisi diatur beserimbai enggau pengerami ke diatur Palan Servis Pelawan enggau Gerempung Raban Nembiak Beserakup (SABERKAS) Pampang Pelawan ti engkeman ungkup bemacham serak pengidup. - EDISI UKAS
