Pengerami Pulai Bruit 2024 Tembu Diatur, Asil Bejual RM200,000
Disiarkan pada 16 Sep 2024
Sumber Berita: UKAS
PULAU BRUIT: Pengerami Pulai Bruit 2024 ke diatur pengelama seminggu tembu diatur kena hari Minggu enggau pengawa nangguh dipenyadika Sapit Menteri di Opis Premier Sarawak (Pekara Korporat, Pemadah enggau UKAS). Datuk Abdullah Saidol.
Urung 5,000 peranak Pulai Beruit enggau kandang menua ngelingi nya bisi datai ke taba Rural Growth Centre (RGC) Semop ngambika ngerichahka pengerami nya.
Lebuh bejaku ba mua mayuh, Datuk Abdullah madah ke pengerami sekali tu udah meransang ekonomi menua nya nengah kaul orang dagang dia ba pemandang bejual enggau aktiviti bedagang.
Ku iya, kandang tiga hari kepenudi nya diatur, bala pedagang ke ngambi bagi mujur ngerikod asil bejual manggai RM200,000.
Penyampau asil nya ku iya, nyengala mandangka pemujur pengerami ninting taun nya ukai semina bisi tuju ngerapit kaul entara komuniti aja tang meri peransang ngagai dagang mit tumbuh.
Ari timbal ke manah diterima nya, Kaban Kunsil Nengeri (ADUN) Semop nya andal ke pengerami nya deka nyadi pematak besai ukai semina ngerapitka kaul dalam komuniti aja, tang mega matak pemeranak puku enggau pengusung ari menua luar lalu nyungkak pemansang ekonomi Pulau Bruit.
Pengerami nangguh nya dirichah enggau pemerindang main asal ari gerup Seri Tandi nyengkaum lagu ari artis tebilang baka Bob Yusuf, Ir Radzi, Fyza Busman enggau sekeda artis menua tu.
Utai ke narit ati bala pengusung, sida mega bisi peluang menang bemacham perais chabut tikit benasip nyengkaum kereban elektrik, telefon pintar, komputer riba, ensikal enggau batang perais iya nya motosikal.
Sama Datai Pegawai Pelilih Daro Zul Usup, Pemancha Bansa Melanau Daro Bujang Razeli, Penghulu Suib Basnu, Penghulu Khatib enggau Penghulu Wahab Gelugo.
Ngena konsep Mini Agrofest, Pengerami Pulau Bruit 2024 mandangka pengawa bejualka asil betanam betupi enggau berikan nyengkaum produk menua tu baka Lumek Salai enggau Sesar Unjur.
Kelimpah ari nya, bemacham aktiviti narit ati bisi diatur baka main enggau lumba, main asal, pelajar enggau pengawa dagang. -EDISI UKAS
