Speaker DUN Sarawak Ngulu Pengerami Makai Selamat Hari Malaysia, Ngerami Semangat Penyerakup
Disiarkan pada 16 Sep 2024
Sumber Berita: UKAS
SRI AMAN: Speaker Kunsil Negeri (DUN) Sarawak, Tan Sri Datuk Amar Mohamad Asfia Awang Nassar disempulang bini, Puan Sri Datin Amar Fatimah Mohamad Iskandar mewakili Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar datai ngerichah Pengerami Makai Selamat Sarawak 2024 ke diatur di Masjid Bandar Sri Aman, kena Hari minggu tu tadi.
Penatai iya disambut enggau ati lantang Sapit Sekretari Perintah Sarawak (Perambu Ekonomi enggau Pemansang), Datu Dr. Muhammad Abdullah Zaidel ke ngari ke Sekretari Perintah Sarawak, Datuk Amar Mohamad Abu Bakar Marzuki.
Pengerami makai selamat nya mega bisi digulu Sapit Menteri Utiliti enggau Telekomunikasyen, Datuk Dr. Abdul Rahman Junaidi sereta Sapit Menteri Pemansang Indu, Nembiak Mit enggau Pengelantang Komuniti Sarawak, Datuk Mohammad Razi Sitam.
Pengerami dipun enggau bacha Yasin enggau Sembiang Makai Selamat ari Imam Besai Sarawak, Sahibul Fadillah Dato Mustapha Kamal Ahmad Fauzi, dientudika Licha Khas ke dikenataika Mufti Sarawak, Sahibus Samahah Datu Kipli Yassin.
Pengerami tembu enggau pengerami makai lemai ke diatur jelan pengerami enggau terima kasih.
Pengerami makai selamat nya siti pelasar beguna ukai semina ngingatka Hari Malaysia aja tang ngerapitka kaul entara bala tuai enggau rayat nengeri tu.
Hari Satu, Yang di-Pertua Negeri Sarawak enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg disadang ngulu Gempuru Hari Malaysia ke diatur ba Stadium Tetutup Kompleks Lumba, Sri Aman.
Pengerami Hari Malaysia Renggat Sarawak 2024 tu mandangka semangat penyerakup enggau begulai bebaik dikena ngingatka reti merdeka enggau terus nyadi pugu ngagai pengelantang nengeri.-EDiSI UKAS
