Nyagam Reti Merdeka & Numbuh Gempung Malaysia Kebendar
Disiarkan pada 16 Sep 2024
Sumber Berita: UKAS
KUCHING: Rambai jaku ‘Malaysia Madani: Jiwa Merdeka’ ke dipilih serimbai ngintu Hari Malaysia 2024 nya pesan khas ngagai semua rayat Malaysia ngenegap enggau nyagam reti kebendar merdeka dalam ati diri genap rayat ti taluka menua.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Hari Malaysia ke dirami kena 16 September ninting taun nyadi nalan genap komuniti ngingatka pengawa numbuhka gempung Malaysia ke ngaul Tanah Melayu, Sabah enggau Sarawak sereta Singapore suba.
“Selamat Hari Malaysia ngagai semua rayat Sarawak. Ngarapka kaul penyerakup kitai terus teguh enggau semangat bebakih begulai ngemansangka Sarawak enggau menua sereta nempa rebak Madani ke ngembuan ulah menyana enggau seruran taluk ngagai ibu pertiwi,” ku iya ba pesan khas serimbai Ngintu Pengerami Hari Malaysia 2024.
Ku Datuk Patinggi Abang Zohari, sepemanjai 61 taun Sarawak dalam Gempung Malaysia, wilayah tu terus nyingkang maju enggau besemekih ba mayuh pengawa dikena negapka ekonomi.
Iya madah, perati nengeri tu nuju polisi nambah ekonomi meruan belalauka pemansut enggau ekonomi digital.
Nambah ke nya ku iya, chara baru nya dikena nipakka Strategi Pemansang Covid-19 (PCDS) 2030 ke meri perati ngagai pengelantang ekonomi, nyerangkung sosial enggau pemeruan rampa menua nyadi batang pengawa nguing ngagai Sarawak nyadi sebuah wilayah maju bepenatai pemisi manggai 2030.
“Nya alai ku iya, Sarawak majak ke mua enggau penegap ke bisi enggau nyapai penyulut nyentuk diaku Bank Dunya nyadi sebuah wilayah bepenatai pemisi.
“Aku mega ngarap pemansang ekonomi majak mansang sereta pengelantang rayat bemacham pengarap enggau pupu bansa di Sarawak,” ku iya madah. -EDISI UKAS
