Begulai Dalam Pengarap Kunchi Pengelantang Pupu Bansa
Disiarkan pada 16 Sep 2024
Sumber Berita: UKAS
BELAGA: Polisi begulai sama dalam jalai pengarap ti dikemeratka perintah betuai ke Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyadi kunchi ngagai pengelantang pupu bansa di nengeri tu.
Ambi ke chunto di Belaga, ke alai pengarap Islam enggau Kristian ulih idup begulai enggau lantang sereta bejalaika pengawa sembiang nengah pemansang rumah sembiang sida empu.
Ku Sapit Menteri Utiliti & Telekomunikasyen Sarawak, Datuk Liwan Lagang, Sarawak chukup betuah laban Premier Sarawak ukai semina berundingka pengelantang orang Islam aja tang semua bansa ke bisi.
“Di Belaga kitai udah ngaga gerija ke besai di Sunggai Asap nengah agih belanja sepenyampau RM10 juta ari YAB Premier lalu, kitai mega ngaga sebuah masjid di Pelilih Belaga ke baru, pen sama pemeri ari YAB Premier kitai.
“Di Long Budang udah didirika sebuah masjid enggau sebuah gerija baru ari YAB Premier. Agih belanja ke diberi YB ngagai gerija enggau misa sembiang nya asil pemeri ari YAB Premier.
Iya madah munyi nya ba Pengerami Nangguh Misa Sembiang Sentral Zon Menua Belaga di Rh. Sekapan Piit, Belaga ditu, kena Hari Minggu tu tadi.
Kaban Kunsil Nengeri (ADUN) Belaga nya nambah, Pemansang Gereja di Rh. Sekapan Piit nya pemeri ari agih belanja Projek Mit Pemansang Menua Pesisir (MRP) enggau Unit Pekara Pengarap Bukai (UNIFOR).
Iya mega madah ke diri udah setuju ngungkupka agih belanja sepenyampau RM15,000 dikena mantu Gerija Sentral Zon Belaga bejalaika program ke bukai.- EDISI UKAS
