BINTULU: Perintah Sarawak bisi langgur dikena ngaga penyangkai kapal Bintulu nyadi hab ke nyulut ba Rantau Asia sepengudah atur pengawa ngambi pulai penyangkai kapal nya tembu bulan Jun tu ila.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nangkan tu ila, Sarawak deka muntang agi ngatur pemansang penyangkai kapal nya ti bela ngaul ubah pemansang ba selampur nengeri tu.
“Langgur ngaga penyangkai kapal Bintulu nya udah bisi tang bedau ulih dipansutka dulu. Enti nyema penyangkai kapal Bintulu nya udah diempu kitai ila, ku deka ngemansangka alai nya nyadi hab ti nyulut ba Rantau asia,” ku iya.
Iya bejaku munyi nya ba Pengerami Ramah Tamah ke diatur Opis Pemansang Bintulu (BDA) ditu, Hari Tiga.
Ba pekara bukai, iya minta genap iku rayat di nengeri tu mengkang mekuhka ulah besaup sereta ngetanka penyerakup ti nyadi pengering ngagai pemansang Sarawak.
“Saup enggau penyerakup beguna dikena kitai ngemansangka nengeri Sarawak,” ku iya.
Sama bela datai, Speaker Kunsil Nengeri (DUN) Tan Sri Datuk Amar Mohamad Asfia Awang Nassar, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, Menteri ba Opis Premier Sarawak, Dato Sri John Sikie Tayai, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali, Sapit Chariman BDA, Dato Haidar Khan sereta temuai dipebasa ke bukai. -EDISI UKAS
-EDISI UKAS
