BINTULU: Kuasa karan di Bintulu deka ditambah ngagai 1,500 megawatt manggai taun 2028.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ba renggat keterubah, kapasiti kuasa karan nya ditambah ngagai 1,000 megawatt ngena turbin gas.
Ku iya, pengawa ngasilka karan ngena turbin gas deka lebih agi muntang sereta kompetitif ti ulih meransang pengerembai enggau penumbuh ekonomi enggau industri.
“Sehari tu aku deka madahka kuasa karan deka ditambah nyentuk 1,000 megawatt ngena turbin gas.
"Ba renggat keterubah, kitai deka nambah kuasa karan ngagai 1,000 megawatt lalu renggat kedua deka ngasilka 500 megawatt agi ba taun 2028 ila, reti iya Bintulu deka bisi karan 1,500 megawatt," ku iya.
Iya madahka pekara nya ba Pengerami Ramah Tamah ke diatur Opis Pemansang Bintulu (BDA) ditu, Hari Tiga.
Nambahka jaku iya, ku Datuk Patinggi Abang Zohari, Bintulu mega deka nyerungkai chara baru dikena ngasilka karan ngena kuasa kinetik.
“Aku deka nguji ngena chara baru iya nya ngena kuasa kinektik.
"Aku deka nguji dulu di Samalaju laban dia kitai udah bisi penyangkai lebih kurang 3.5 kilometer ngena alun umbak," pia ku iya.
Sama bela datai, Speaker Kunsil Nengeri (DUN) Tan Sri Datuk Amar Mohamad Asfia Awang Nassar, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, Menteri ba Opis Premier Sarawak, Dato Sri John Sikie Tayai, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali, Sapit Chariman BDA, Dato Haidar Khan sereta temuai dipebasa ke bukai. -EDISI UKAS
